Kveðst sleppa stjórn öryggissveita

Jasser Arafat, Palestínuforseti, er sagður hafa lofað því að veita ríkisstjórn Ahmed Qureia forsætisráðherra aukin völd, þess á meðal full yfirráð yfir öryggissveitum Palestínumanna. Þetta sagði palestínski þingmaðurinn Imad Falloyuji eftir að Arafat ræddi við þingmenn. Fallouji sagði Qureia hafa lofað að skoða tilboð Arafats. Arafat hefur áður lofað því að láta af stjórn öryggissveitanna en ekki staðið við það. Stjórn öryggismála er helsta deiluefni forsetans og forsætisráðherrans. Palestínska þingið féll í gær frá hótun sinni um að fara í verkfall ef Arafat yrði ekki við óskum þeirra um að veita ríkisstjórninni aukin völd og betri aðstöðu til að stjórna málum í Palestínu. Þingmenn kröfðust þess þó að þingið fengi aukin völd og kæmi meðal annars að baráttunni gegn spillingu í öryggissveitunum umdeildu.