Tugir fórust í sprengingu

Á fjórða tug manna lét lífið þegar sprenging varð í úkraínskri kolanámu. Björgunarstarfsmenn börðust við mikið bál, banvænar gasgufur og allt að fimmtíu stiga hita þegar þeir reyndu að bjarga nokkrum kolanámumönnum sem var saknað eftir slysið. Síðdegis í gær hafði 31 lík fundist í námunni. Þá var enn ekki vitað um afdrif fimm manna. "Við höldum áfram að leita," sagði Andrey Klyuyev, aðstoðarforsætisráðherra Úkraínu, sem tók að sér stjórn mála á vettvangi. Sprengingin átti sér stað á um þúsund metra dýpi aðfaranótt þriðjudags.