Skjóta niður eiturlyfjasmyglara

Brasilíumenn ætla, eftir þrjá mánuði, að byrja að skjóta niður flugvélar sem þá grunar að séu notaðar til eiturlyfjaflutninga yfir hina víðáttumiklu frumskóga landsins. Yfirvöld í Brasilíu segja að yfir 4000 óskráðar flugvélar séu á sveimi yfir Amazon skógunum, sem eru víðáttumeiri en bandaríska meginlandið. Brasilískar orrustuvélar munu þó því aðeins hefja skothríð ef viðkomandi flugmenn neita að gera grein fyrir sér, eða hlýði ekki fyrirmælum um að lenda á einhverjum ákveðnum flugvelli.