20 börn enn í lífshættu

Tuttugu börn, sem brunnu illa í eldsvoða í barnaskóla í smábæ á Indlandi á föstudag, berjast enn fyrir lífi sínu. Fjöldi fólks gekk þögult um götur bæjarins Kumbakonam í gær til að votta aðstandendum samúð sína og knýja á um að stjórnvöld í landinu bæti ástand skólabygginga en skólarnir eru margir starfræktir í óviðundandi húsnæði. Sonja Gandhi, forseti Kongressflokksins, var í Kumbakonam í gær. Hún sagði ríkisstjórnina munu greiða fjölskyldum þeirra barna sem létust í brunanum bætur og hét því að fjármunir yrðu lagðir í að bæta brunavarnir í skólum á svæðinu. Svartir fánar hafa verið hengdir utan á rústir skólabyggingarinnar sem brann. Víða má sjá ummerki þess að börnin hafi reynt að grafa sig út í gegnum veggina líkt og slökkviliðsmenn gerðu til að reyna að ná þeim út. 700 börn voru í byggingunni þegar kviknaði í. 90 börn, flest á aldrinum 6-10 ára, létust.