Arafat uppræti spillingu

Palestínskir mótmælendur hafa gengið um götur Gasaborgar og krafist þess að Jasser Arafat forseti uppræti spillingu. Valdabarátta milli palestínskra afla verður æ meira áberandi eftir því sem nær dregur áætlunum Ariels Sharons, forsætisráðherra Ísraels, um að kalla hersveitir sínar af svæðinu og leggja niður landnemabyggðir á næsta ári. Tvær mótmælagöngur hafa verið í Gasaborg síðasta sólarhring. Fólkið, sem margt hvert var vopnað, mótmælti spillingu innan stofnana palestínsku heimastjórnarinnar og einnig þeim breytingum sem Jasser Arafat forseti hefur gert á yfirstjórn öryggissveita stjórnarinnar. Arafat hefur ráðið frænda sinn, Mousa Arafat, sem yfirmann öryggsstofnana og sett nýjan lögregluforingja í embætti sem sakaður hefur verið um valdníðslu og spillingu. Vopnaðir liðsmenn hóps sem tengist Fatah-hreyfingu Arafats hefur einnig komið þeim skilaboðum áleiðis að þeir hafni þessum breytingum alfarið. Markmið Arafats var að einfalda skipulag öryggissveitanna en bæði Bandaríkjamenn og Ísraelar hafi krafist slíkra breytinga til að liðka fyrir friðarumræðum sem hafa verið í pattstöðu. Síður en svo hefur dregið úr því neyðarástandi sem heimastjórnin lýsti yfir í Gasaborg í gær og varð til þess að forsætisráðherra Palestínu, Ahmed Querei, sagði af sér. Uppsögn hans tekur þó ekki gildi fyrr en ríkisstjórn heimastjórnarinnar kemur saman á morgun. Arafat, hefur neitað að taka mark á uppsögn forsætiráðherrans.