Mannfall heldur áfram

Tugir manna liggja sárir og að minnsta kosti sex eru látnir eftir að tvær bílsprengjur sprungu í Bagdad í Írak í morgun. Önnur sprakk í námunda við bílalest nýskipaðs dómsmálaráðherra landsins, Maliks Dohans al-Hassans. Ráðherrann slapp ómeiddur en fjórir lífverðir hans létust. Á sömu stundu sprakk bílsprengja fyrir utan bækistöðvar írakska þjóðvarðliðsins. Þar létust tveir og tugir særðust. Ekkert lát er á árásum á embættismenn bráðabirgðastjórnarinnar í Írak en samstarf þeirra og bandaríska herliðsins er uppreisnarmönnum í landinu þyrnir í augum.