Líf hundruð þúsunda í hættu

Þjóðarmorð og hungursneyð gætu leitt til dauða hundruð þúsunda í Darfur-héraði í Súdan. Íslensk kona, sem bjó um hríð í Súdan, segir ástandið hluta af víðtækari deilum í landinu sem eigi sér langa sögu. Í morgun hófust viðræður í Addis Ababa í Eþíópíu á milli stjórnvalda í Khartoum og tveggja uppreisnarhópa frá Darfur. Hvergi var að sjá fulltrúa illræmdra skæruliðasveita Araba sem hermt er að beri ábyrgð á þjóðarmorði. Fullyrt er að skæruliðarnir starfi fyrir stjórn Súdans. Viðræðurnar gengu þó illa í dag, skæruliðar settu margskonar skilyrði sem stjórnvöld höfnuðu umsvifalaust. Ástandið í Darfur er skelfilegt. 1,2 milljónir manna hafa flúið heimili sín í héraðinu og segja sérfræðingar Sameinuðu þjóðanna ástandið hvergi verra í heiminum. Janjaweed-skæruliðar eru sagðir hafa drepið 30 þúsund manns og hundruð þúsunda bíður hungurdauði, þrátt fyrir tilraunir hjálparstofnana til neyðaraðstoðar.  Sigurbjörg Soebeck, sem bjó um hríð í Súdan, segir ófriðinn í héraðinu vera í beinum tengslum við ófriðinn í suðurhluta landsins. Hún segir stjórnvöld í Khartoum hafa verið fús til að sætta sig við málamiðlanir og eftirgjöf í viðræðum við uppreisnarmenn í suðurhluta Súdans, en þegar Darfur-búar hafi einnig viljað umbætur hafi mælirinn verið fullur í bili. Öryggisráð Sameinuðu þjóðanna mun í næstu viku ræða ályktunartillögu sem hótar stjórnvöldum í Khartoum refsiaðgerðum, verði ekki breyting á ástandinu í Darfur.