Þörf á menningarlegri fjölbreytni

Mótun pólitískrar stefnu sem viðurkenni menningarlegan fjölbreytileika ríkja er ekki aðeins ákjósanleg stefna, heldur beinlínis nauðsynleg í nútímasamfélögum. Þetta er meðal þess sem kemur fram í skýrslu Þróunaráætlunar Sameinuðu þjóðanna um menningarlegan fjölbreytileika í ríkjum heims í dag. Í skýrslunni er athygli vakin á spurningum á borð við hvernig stjórnarskrá Íraks muni koma til móts við kröfur Shíta múslima og Kúrda og hversu mörg tungumál í Afghanistan verði viðurkennd sem opinbert tungumál hins nýja ríkis. Í skýrslunni segir að menningarlegt frelsi eigi að vera viðurkennt sem hluti af almennum mannréttindum og nauðsynleg forsenda fyrir þróun í samfélögum 21. aldarinnar. Einnig kemur fram að litið sé á menningarlegan fjölbreytileika sem vandamál í mörgum ríkjum heims, sem sé oftar en ekki afleiðing af alls kyns kreddum og bábiljum. Skýrslan viðurkennir að það verði erfitt fyrir ríki að innleiða stefnu um margbreytileika en það verði að gera, til dæmis með því að viðurkenna hann í stjórnarskrá.