Lífslíkur þverrandi í sumum löndum

Lífslíkur fólks í mörgum ríkjum Afríku eru komnar niður í 33 ár og hafa minnkað til muna vegna alnæmisfaraldursins sem leikur ýmsar þjóðir afar grátt. Þetta eru niðurstöður skýrslu Þróunarstofnunar Sameinuðu þjóðanna sem kynnt var fyrir skemmstu. Kemur fram að í 20 ríkjum heimsins fara lífsskilyrði stöðugt versnandi meðan þau batna meðal vestrænna ríkja. Meginástæða versnandi lífskjara milljóna manna er talin vera alnæmisveiran en algengt er að þeir sem af henni sýkjast séu í blóma lífsins og á því skeiði sem viðkomandi skilar hvað mestu af sér til þjóðfélagsins. Eru þetta svipaðar niðurstöður og Alþjóðavinnumálastofnunin komst að í ítarlegri skýrslu sinni sem birt var um síðustu helgi. Noregur er það land í heiminum þar sem lífskjör þykja best en slíkt mat er byggt á rannsóknum á lífslíkum, menntunarstigi, heilsugæslu og fleiri slíkum atriðum hjá hverri þjóð fyrir sig. Íslendingar geta vel við unað í sjöunda sæti og eru fyrir ofan stórþjóðir á borð við Bandaríkin, Bretland og Japan. Dæmið snýst alveg við þegar neðstu löndin eru skoðuð. Þar þykir verst að búa í Sierra Leone og Níger, Burkina Faso og Mali eru þar ekki hátt fyrir ofan. Alvarlegast þykir að í einstaka löndum sem hvað harðast hafa orðið úti vegna sjúkdóma á borð við alnæmi, borgarastyrjalda svo ekki sé minnst á matar- og vatnsskort, hafa lífslíkur einstaklinga minnkað til muna. Zambía kemur einna verst út en þar eru lífslíkur aðeins 32.4 ár. Þykir höfundum skýrslunnar ljóst að alnæmisfaraldurinn hafi að miklu leyti þurrkað út þann árangur sem náðst hefur gegnum tíðina með hjálpar- og þróunaraðstoð til handa fátækustu ríkjum Afríku.