Leyfa eftirlíkingar alnæmislyfja

Jacques Chirac, forseti Frakklands, kallar það jafngildi fjárkúgunar að Bandaríkjamenn skuli þrýsta á fátækar þjóðir að gefa eftir rétt sinn til að framleiða ódýrar eftirlíkingar af alnæmislyfjum í skiptum fyrir tilslakanir í viðskiptum. Flestir HIV-smitaðir búa í sunnanverðri Afríku en aðeins örfáir fá lyf enda eru þau einkaleyfisvernduð og mjög dýr. Nokkrar fátækar þjóðir framleiða þó ódýrar eftirlíkingar og hafa uppskorið hatramma baráttu lyfjarisanna sem eiga einkaleyfin. Mánaðarskammtur af eftirlíkingu kostar tvö þúsund krónur á meðan einkaleyfisvernduðu lyfin kosta 20 þúsund. Því hefur spurningin í brennidepli verið hvort vegi þyngra, mannslíf eða lög um viðskipti. Alþjóðaviðskiptastofnunin svaraði spurningunni síðasta haust þegar hún samþykkti að heimila fátækum þjóðum að búa til ódýrar eftirlíkingar. Frakkar gagnrýndu í dag Bandaríkjamenn fyrir að þrýsta á fátækar þjóðir að gefa eftir þennan rétt sinn í skiptum fyrir tilslakanir í viðskiptum milli landa. Jacques Chirac, forseti Frakklands, kallaði þetta jafngildi fjárkúgunar á ráðstefnu um alnæmi í Bankok í dag. Meðan ráðherra las upp skilaboðin frá Chirac brutust út mótmæli Afríkubúa sem rukkuðu átta stærstu iðnríki heims um fjármagn í baráttuna gegn alnæmi, eins og þau hafa lofað. Xavier DaCoste, ráðherra þróunarmála, segir að tryggja ætti stöðugt fjármagn til Alþjóðasjóðsins og hækka framlagið í hann í þrjá milljarða á ári. Sú upphæð ætti einkum að koma frá Evrópuríkjum og Bandaríkjunum, auk annarra sem leggja fé í sjóðinn.