Unnið að endurskipulagningu

Kortagerðarmenn Ísraelshers vinna að því að endurteikna öryggismúrinn sem er í byggingu á vesturbakka Jórdanar. Gert er ráð fyrir að múrinn liggi nær Ísrael og lágmarki skaða Palestínumanna af hans völdum að sögn embættismanna. Breytingarnar eru gerðar í kjölfar úrskurðar Hæstaréttar Ísraels í síðasta mánuði að fyrirhuguð lega múrsins bryti gegn réttindum Palestínumanna. Niðurstaða alþjóðadómstólsins í Haag um að múrinn sé ólöglegur mun ekki hafa áhrif á legu múrsins að sögn embættismanna sem segjast einungis taka mark á dómi Hæstaréttar. Ekki er búist við að gerðar verði stórar breytingar á þeim hluta múrsins sem þegar hefur verið byggður.