Stálmúr í kringum þinghúsið

Breska innanríkisleyniþjónustan, MI 5, vill að róttækar breytingar verði gerðar á fyrirkomulagi öryggismála í og við breska þingið til að koma í veg fyrir hryðjuverk. Meðal þess sem sérfræðingar MI 5 eru sagðir ætla að leggja til er stálmúr í kringum Westminster sem er þinghús þeirra Breta. Fram til þessa hafa stórir steypuklumpar verið staðsettir í kring en þeir eru nú taldir meiri ógn en öryggisvörn þar sem hryðjuverkamenn gætu ekið bílum, fylltum sprengiefni, á þá og brot úr klumpunum þeyst út um allt. Sérfræðingarnir munu einnig hafa af því áhyggjur að Big Ben, eitt af kennileitum Lundúna, gæti fallið ofan á þinghúsið væri gerð hryðjuverkaárás á turninn.