Yngsti Douglasinn deyr

Eric Douglas, yngsti sonur leikarans Kirk Douglas og hálfbróðir stórstjörnunnar Michael Douglas, er látinn 46 ára að aldri. Hann hafði árum saman glímt við áfengis- og eiturlyfjafíkn sem hann rakti meðal annars til álagsins sem fylgdi því að standa í skugganum af frægum föður og enn frægari bróður. "Pressan sem fylgir því að vera yngsti sonurinn í jafn frægri fjölskyldu lagðist stundum þungt á mig," sagði Eric í við viðtali við Daily News fyrir nokkrum árum. "Mér fannst ég alltaf þurfa að bera mig saman við þá [Kirk og Michael]". Vinnukona Erics kom að honum látnum í íbúð hans í New York og að sögn lögreglu bendir ekkert til þess að aðrir hafi átt þátt í dauða Erics en niðurstöður krufningar liggja ekki fyrir. Eric reyndi að vinna fyrir sér sem uppistandsgrínari og leikari og kom fram í nokkrum fjölda sjónvarpsþátta og lélegum bíómyndum á borð við Delta Force 3. Ættingjar Erics hafa ekki viljað tjá sig um fráfall hans en talsmaður fjölskyldunnar sendi fjölmiðlum stutta yfirlýsingu þar sem fram kom að mikil sorg ríki í fjölskyldunni vegna óvænts fráfalls Erics og talsmaður fjölskyldunnar fór þess á leit við fjölmiðla að þeir virði friðhelgi fjölskyldunnar á þessum erfiðu tímum.