Skuldajöfnun ekki sjálfvirk

Komið getur upp sú staða í reikningshaldi Orkuveitu Reykjavíkur að viðskiptavinir skuldi peninga á einum stað, en eigi inni annars staðar vegna ofáætlunar, t.d. á heitavatnsnotkun. Dragist greiðslur vegna skuldar safnast á hana vextir og gjöld, en viðskiptavinir fyrirtækisins fá ekki vexti á inneign sína. Orkuveitan rekur rafmagns-, hita-, vatns- og boðveitu. Eysteinn Jónsson, sviðsstjóri sölusviðs Orkuveitunnar, segir sjálfsagt mál að láta inneign á einu sviði ganga upp í skuld á öðru, en fólk verði hins vegar að bera sig eftir því. "Við prófuðum að hafa þetta sjálfvirkt, en þá kom í ljós að menn voru með ýmislegt annað, s.s. sameiginlega bílskúra, skráða á eigið nafn og vildi alls ekki láta rugla þessum hlutum saman," sagði hann og bætti við að inneignir væri greiddar út færi fólk fram á það. "Oft á tíðum vill fólk samt láta inneign ganga upp í næstu reikninga." Eysteinn segir greiðslu vaxta á inneignir verða flókna í framkvæmd því þá þyrfti Orkuveitan að standa skil á fjármagnstekjuskatti, auk þess sem fyrirtækið hafi í raun lítinn áhuga á að geyma fyrir fólk peninga. Hann sagði inneignir liggja óhreyfðar þar til fólk léti heyra frá sér, en þó væri fólk sem ætti inni fjárhæðir um lengri tíma látið vita.