Arftaki Kournikovu er moldrík

Tennisdrottningin Maria Sharapova mun þéna hátt á þriðja milljarð króna áður en árið er liðið, eftir að hún tryggði sér sigur á Wimbledon-mótinu um liðna helgi. Og sú upphæð gæti vel fimmfaldast á næstu árum að sögn kunnugra í tennisheiminum. Maria Sharapova er ekki nema 17 ára og var fyrir helgina best þekkt fyrir fegurð sína og öskrin á tennisvellinum. Hún hristi aftur á móti heldur betur upp í tennisheiminum þegar hún sigraði fyrrum meistarann Serenu Williams á Wimbledon. Sigurinn mun gera Sharapovu að einu af stærstu nöfnunum í íþróttaheiminum og jafnframt eina af hæst launuðu konunum þar. Farsímar, tískuföt, snyrtivörur og drykkjarvörur eru á meðal þess sem stórfyrirtæki bíða eftir að hún taki að sér að auglýsa. "Hún er búin að meika það. Hún þarf ekki að hafa áhyggjur af neinu í framtíðinni," segir umboðsmaður hennar. "Við munum sjá mikið mun meira af Mariu héðan í frá." "Hún er falleg, hressileg og skemmtileg stelpa og öllum mun líka vel við hana. Hún er orðinn milljónamæringur á einni nóttu og tekjur hennar munu margfaldast á næstunni. Það eru góðar líkur á því að hún verði hæst launaða konan í sögu tennisins," sagði Max Clifford, einn af þekktustu umboðsmönnunum í bransanum. "Hún kemur sem ferskur andvari inn í tennisinn." Margir hafa líkt henni við Önnu Kournikovu sem þótti efnilegasta tenniskona heims á sínum tíma. Kournikova vakti, rétt eins og Sharapova, einnig athygli fyrir fegurð sína og svo fór á endanum að hún sneri sér alfarið að fyrirsætustörfum. Munurinn á þeim tveimur er sá að Kournikovu tókst aldrei að sigra á stórmóti en það hefur Sharapova þegar gert. Það má því ljóst vera að Sharapova á eftir að gleðja augu karlpeningsins á tennisvellinum um mörg ókomin ár. Forvitnilegast verður hins vegar að fylgjast með karlamálunum sem verða augljóslega í sviðsljósinu eftir því sem frægð hennar og frami eykst.