Næsland á Karlovy Vary

Kvikmyndahátíðin Karlovy Vary í Tékklandi stendur nú yfir. Meðal þeirra 15 mynda sem keppa til verðlauna er kvikmyndin Næsland í leikstjórn Friðriks Þórs Friðrikssonar. Í gærmorgun var blaðamannafundur með aðstandendum myndarinnar þar sem Friðrik Þór  ásamt Gary Lewis, aðalleikara myndarinnar, sátu fyrir svörum. Gary Lewis er þekktur skoskur leikari sem hefur unnið með leikstjórum á borð við Danny Boyle, Ken Loach, Stephen Daldry og Martin Scorsese en þekktustu myndir hans eru Billy Elliot og Gangs of New York. Heimsfrumsýning á Næsland var í gærkvöldi og uppselt var á sýninguna þar sem færri komust að en vildu enda var aftur uppselt á sýningu myndarinnar í dag. Næsland hefur vakið athygli og hlotið umtal en dómar hafa ekki enn birst um myndina. Kvikmyndin Kaldaljós er einnig á hátíðinni sem hluti af dagskrá er nefnist "Horizons" en þar er lögð áhersla á kvikmyndir sem hafa unnið til verðlauna á alþjóðlegum kvikmyndahátíðum og hafa vakið verðskuldaða athygli.