Britney ætlar sér að giftast Kevin

"Öll önnur ástarævintýri voru æfingar fyrir samband mitt við Kevin," segir söngkonan Britney Spears sem mun ganga í það heilaga ásamt dansaranum Kevin Feder í nóvember. Britney segir að ástin milli þeirra Kevins sé alvöru og alls ekkert grín eins og þegar hún giftist æskuvini sínum Jason Alexander í Las Vegas. "Loksins, eftir að hafa kysst marga froska, hef ég fundið prinsinn minn." Söngkonan kynntist dansaranum á uppáhalds skemmtistaðnum hennar í Hollywood. "Strax og ég sá hann vissi ég að hann væri sá eini rétti. Hann virkaði eins og segull á mig og ég gat ekki látið hann í friði." Parið fór fljótelga að vera saman og Britney var svo ástfangin að hún spáði í að fresta tónleikaferðalagi sínu um Evrópu. Mamma hennar tók það hins vegar ekki í mál svo Britney varð að sannfæra Kevin um að koma með. "Í flugvélinni vorum við að spjalla um ástina og hjónabandið og áður en ég vissi af hafði ég beðið hans," sagði Britney í nýlegu viðtali. Kevin segist hafa orðið svo hissa á uppátækinu að hann hafi neitað en sá fljótlega að sér og bað hennar. "Já, já," heyrðist í Britney um leið og hún kastaði sér í fang hans. "Mér er alveg sama hvað fólki finnst, ég elska þennan mann og ætla að giftast honum." Britney blæs á þær sögur sem segja að parið hafi ákveðið að giftast þar sem söngkonan sé ófrísk. "Ég elska börn og ætla mér að eignast allavega fjögur stykki en við ætlum að byrja á því að fá okkur hund." Kevin er eini ljósi bletturinn í lífi Britneyjar í langan tíma þar sem hvert áfallið á eftir öðru hefur dunið á söngkonunni. Fyrst var það giftingin í Vegas, lítil aðsókn á tónleika hennar og gagngrýni á klæðaburð hennar, hnémeiðsli og nú síðast gagngrýni á vaxtalag hennar. "Mér finnst eins og ég sé föst í martröð sem ég kemst ekki úr," sagði Britney við vini sína. Nú er hún aftur á móti hin ánægðasta. "Maður getur ekki alltaf verið fullkominn og grannur. Ég borða það sem ég vil og líkar hvernig ég lít út."