Elskaður af FM-hnökkum

"Ja, þetta er ekkert voðalega fyndið ef að þetta á að vera grín," segir Doddi litli um Love Gúrú en plata hans Party Hetja kemur í verslanir á mánudaginn og að því tilefni verða útgáfutónleikar á Gauki á stöng á föstudagskvöldið. Love Gúrú hefur verið vinsæll hjá FM-hnökkunum og á hlustendaverðlaunum FM 95.7 var Love Gúrú valinn efnilegastur að mati hlustenda en lög hans 1-2 Selfoss, Ástarblossi og Partý út um allt, hafa öll komist hátt á Íslenska listanum. Margir hafa séð tengingu við þýska techno-tröllið Scooter í lögum og útliti Love Gúrú en Doddi segist ekki vera aðdáandi hans. "Fyrirmynd Love Guru er bara ég sjálfur þegar ég reyni að vera sexý sem gengur ekki alveg upp þar sem ég er bæði feitur og sköllóttur. Þetta byrjaði sem útvarp-sketch en er í dag einskonar brandari sem gekk bara of langt." Doddi segir að hann hlusti ekki sjálfur á þessa tegund tónlistar. "Við erum tveir sem semjum lögin á plötuna, ég og Ingó en flest viðlögin eru hins vegar stolin." Spurður hvort hann haldi að hann sé vinsæll á Selfossi í kjölfar lagsins 1-2 Selfoss sem gerir grín að Selfoss-stereotýpunni, segist Doddi ekki vera viss. "Stefnan er hins vegar sett á Selfoss, ég verð í Hvíta húsinu á laugardaginn svo að það kemur bara í ljós," en Doddi býst þó við því að hann að verði frekar hylltur en barinn. Útgáfutónleikarnir hefjast kl 20 og kostar aðeins 1.000 kr. inn. Auk Love Gúrú munu Nylon, Tinna Marína, Hreimur Örn, Kristín Ýr og Frikki úr Igore, Beta Rokk og margir fleiri koma fram en allir þessir listamenn koma við sögu á plötunni. Ekkert aldurstakmark er á tónleikana.