Aftur skellt í fangelsi og meðferð

Fyrrverandi eiginkona rapparans Eminem hefur verið dæmd til að dúsa í fangelsi eftir að hafa skrópað í meðferð sem henni var gert að gangast undir og fyrir að leggja á flótta undan réttvísinni. Kim Mathers, sem er 28 ára, var dæmd í eins árs fangelsi af dómaranum Edward Servitto, sem lagði áherslu á það þegar hann kvað upp dóminn að hann væri orðinn þreyttur á henni. Þrátt fyrir þetta verður hún aðeins að afplána 140 daga af dómnum áður en hún verður að gangast undir meðferð. Ljúki hún ekki þeirri meðferð mun hún verða send aftur í fangelsi þar sem hún þarf að eyða öðru ári. Mathers hefur tvisvar sinnum hætt í meðferð sem hefur verið ákveðin af dómara auk þess sem hún sat í fangelsi nú í ár.