Geimveran Alf aftur á skjáinn

Alf, geimveran frá plánetunni Melmac, mun stjórna nýjum spjallþætti sem fer í loftið 7. júlí á sjónvarpsstöðinni TV Land vestanhafs. Alf mun koma í stað hins fræga Johnny Carson og mun þátturinn verða hálftíma langur. Spjallþátturinn hans Alf mun mjög líkjast ósköp venjulegum spjallþætti. Þar mun Alf fara með einleik, pólitísk gamanmál og fá valinkunna einstaklinga í heimsókn til sín. Að sögn Alfs mun þáttur þessi verða miklu betri en þættir Jays Leno, Davids Letterman og Conans O´Brien. "Forstjórar TV Land hafa einstaklega góðan smekk að ráða mig til starfa og gefa mér minn eigin þátt. Ég fer næstum því hjá mér hversu vel þeir koma auga á mína óviðjafnanlegu snilligáfu," segir Alf. Um leið og þættinum lýkur sýnir stöðin fjóra gamla Alf-þætti en óvíst er um framhald spjallþáttanna. Ef vel gengur gæti TV Land ákveðið að búa til heila seríu tileinkaða furðufuglinum Alf.