Sjötta Harry Potter bókin fær nafn

Sjötta og næst síðasta bókin um Harry Potter kemur til með að heita "Harry Potter and the Half Blood Prince" á móðurmálinu. Höfundur ævintýranna um galdradrenginn J.K. Rowling greindi frá þessu á heimasíðu sinni í gær. Þar birti hún reyndar marga titla en sagði að hörðustu aðdáendurnir ættu að geta skorið úr um hver væri sá raunverulegi. Þar vísaði hún í það að þessi sami bókartitill var eitt sinn í athugun fyrir aðra bókina í röðinni, sem síðar fékk nafnið Harry Potter og Leyniklefinn. Rowling segir að prinsinn sem minnst er á í titlinum sé hvorki Harry né erkifjandi hans Voldemort. Hún lofaði svo að gefa fleiri vísbendingar um söguþráðinn eftir að hún hefur klárað bókina. "Upphaflega ætluðum við að upplýsa nokkur mikilvæg leyndarmál úr Leyniklefanum, en áttuðum okkur snemma á því að þær upplýsingar væru best geymdar fram að sjöttu bókinni," segir hún á heimasíðunni. "Eins og ég hef sagt áður, eru mjög mikilvægar vísbendingar í Leyniklefanum sem eru mjög mikilvægar endalokum seríunnar."