Scarlett leysir Kate af hólmi

Kate Winslet hefur hætt við að leika í nýjustu mynd Woody Allen. Myndin verður sú fyrsta sem Allen gerir í London en ástæðan fyrir brotthvarfi Winslet er sú að hún kýs frekar að eyða tíma með börnum sínum. Nú segja kunnugir að Scarlett Johansson hafi tekið að sér verkið en Scarlett þekkja flestir úr myndinni "Lost in Translation". Hún slæst því í hóp leikaranna Emily Mortimer og Jonathan Rhys-Meyers en myndin hefur ekki enn fengið nafn. Kate hætti við þátttöku sína eftir að hún sá vinnuáætlunina sem hentaði alls ekki þar sem eiginmaður hennar Sam verður einnig við tökur á þessum tíma. Kate skrifaði afsökunarbréf til framleiðenda myndarinnar en hún dró loforð sitt til baka aðeins tveimur vikum eftir að tilkynnt hafði verið að hún yrði stjarna myndarinnar. Scarlett virðist hins vegar vera óhrædd við að hlaða á sig verkefnum því hún hefur einnig í hyggju að leika í "Mission Impossible 3", "The Black Dahlia", "The SpongeBob SquarePants Movie" og myndinni "A Good Woman". Þessi nýjasta mynd Woody Allen verður 36. mynd leikstjórans og sú fyrsta sem er tekin upp algjörlega fyrir utan New York.