Vamm tónlistar og tísku

"Okkur fannst vanta tímarit sem stílar bæði inn á stráka og stelpur," segir Hlédís Sigurðardóttir en fyrsta eintak tímaritsins Vamm, sem hún ritstýrir ásamt Halldóru Þorsteinsdóttur, kom út í síðustu viku. "Baldur Baldursson er framkvæmdastjóri og markaðsstjóri blaðsins en hann var áður að vinna hjá Undirtónum en á bakvið blaðið stendur líka hópur fólks sem hittist reglulega og kastar á milli sín hugmyndum. Við Halldóra höldum svo utan um efnisþáttinn og skrifum í blaðið ásamt fjölmörgum lausráðnum pennum." Hlédís segir nýja tímaritið fókusera á tónlist og tísku. "Við höfum fengið mjög sterk viðbrögð við blaðinu og fólk er greinilega þakklátt fyrir blað með tónlistarumfjöllun. Í Vamm eru líka fréttir af alls kyns erlendum og innlendum atburðum og við reynum að komast baksviðs til að ræða við listamenn. Við sendum blaðið heim til allra á aldrinum 18-25 ára og í því er einnig lesefni um samskipti kynjanna og ýmislegt sem höfðar til ungs fólks," segir Hlédís en blaðið Vamm kemur út annan hvern miðvikudag og er dreift ókeypis á kaffihús, í bíó og búðir borgarinnar. Forsíðuviðtal fyrsta Vamm blaðsins er við President Bongo eða Stephan Stephensen í Gusgus. "Hann er einn af trendsetterum Reykjavíkurborgar að okkar mati bæði í útliti og tónlist. Við ætlum að reyna að tala við fólk sem er ekki alltaf í fjölmiðlum og fólk sem er að gera nýja hluti en í rauninni er blaðið blanda af neðanjarðar- og markaðsvænu efni. Næsta forsíðuviðtal er til dæmis við Esther Taliu Casey en þar sem við viljum höfða til beggja kynja viljum við að sjálfsögðu hafa stráka og stelpur til skiptis á forsíðunni."