Skálkaskjólið skapað

Fyrir nokkru bárust fregnir af því að Ölstofa Kormáks og Skjaldar væri að færa út kvíarnar, þó ekki hafi þeir félagar, Kormákur og Skjöldur, ákveðið hvað gera skyldi við þennan nýja stað. Nú hafa þeir fundið honum hlutverk, þó einungis tímabundið sé. Líkt og fjölmargir aðrir Íslendingar eru þeir kolfallnir fyrir boltanum í Evrópukeppninni og hafa því lagt staðinn til sem skjól þeirra, vina og kunningja til að hægt sé að fylgjast með glæsilegum sköllum, spyrnum og átökum í þægilegu umhverfi. Því hefur staðurinn hlotið nafngiftina Skálkaskjól. Skálkar eru yfirleitt ekki mikið fyrir það að auglýsa hvar þeir koma saman og það vilja þeir félagar ekki gera heldur. Að minnsta kosti ekki fyrr en knattspyrnuhátíðinni lýkur og staðurinn hefur fengið nýtt hlutverk, hvað það verður er ekki orðið ljóst. Þeir sem hljóta náð gestgjafanna njóta þó mikils jafnréttis, óháð því hvaða land er stutt til sigurs. Því var stóru sjónvarpi komið fyrir, auk risaskjás, á meðan tveir leikir voru spilaðir á sama tíma. Því var engin hætta á átökum yfir vali á því hvaða fótboltaleik ætti að fylgjast með.