Tarantino vill gera Kill Bill 3

Leikstjórinn Quentin Tarantino ætlar sér að gera þriðju myndina í Kill Bill bálknum. Fyrstu tvær myndirnar hafa notið mikilla vinsælda en ekki var talið að þriðja myndin yrði nokkurn tímann gerð. "Ég hef í hyggju, ekki strax heldur eftir svona 15 ár, að gera þriðju myndina í bálknum," sagði Tarantino í viðtali vegna frumsýningar Kill Bill Vol. 2 á Spáni í næsta mánuði. Hann sagði að þriðja myndin muni fjalla um stúlkuna Nicky, dóttur leigumorðingja sem persóna Umu Thurman myrti í hefndarför sinni. Tarantino segist hafa sett markið hátt þegar hann tók upp fyrstu tvær myndirnar. ""Gott" hefði ekki verið nógu gott fyrir mig og vel gert hefði verið móðgun. Ég gerði myndirnar til að geta búið til einhver mestu hasaratriði sem nokkurn tímann hafa verið gerð," sagði hann. Tarantino viðurkennir einnig að ofbeldi geti dáleitt aðdáendur. "Það er ein ástæða þess að það kemur svo vel út á stóru tjaldi. Ég hef alltaf sagt að Thomas Edison hafi fundið upp kvikmyndavélina til að sýna fólk drepa og kyssa."