Vopnahlé í Súdan

Stríðandi fylkingar í Súdan undirrituðu í morgun heit um að ná friðarsamningum fyrir árslok á fundi Öryggisráðs Sameinuðu þjóðanna í Kenía. Talið er að yfir tvær miljónir Súdana hafi látið lífið vegna borgarastríðsins sem hefur geisað í 21 ár milli araba í norðurhluta landsins og annarra þjóðflokka í suðri. Fyrir tveimur árum hófst uppreisn í Darfur-héraði sem stjórnvöld svöruðu með því að styðja herskáa araba sem hafa farið um með ránum og morðum og hrakið milljónir manna á flótta í Darfur. Hjálparsamtök segja að að minnsta kosti 70 þúsund manns hafi týnt lífi á síðustu tveimur árum vegna þessa. Þjóðarmorð er orðið sem notað hefur verið um aðgerðir herskárra araba og Sameinuðu þjóðirnar segja neyð fólksins þá alvarlegustu sem upp hefur komið. Það er óvenjulegt að Öryggisráðið fundi utan höfuðstöðva sinna. Það hefur ekki gerst í 14 ár en var gert vegna hins alvarlega ástands í Darfur. Hjálparsamtök segja að ástandið hafi farið versnandi undanfarið og hungursneyð geisaði meðal flóttamanna. Leiðtogi uppreisnarmanna í suðurhluta landsins og varaforseti Súdans komu báðir fyrir Öryggisráðið í morgun og hétu því að ná friðarsamningum fyrir lok ársins. Öryggisráðið heitir á móti aðstoðar í formi niðurfellingu skulda og neyðaraðstoðar. Hjálparsamtök segja hins vegar að samkomulagið sé of óljóst og tíminn sé að renna út - aðstoð hefði átt að berast fyrir löngu síðan.