Gjaldið í Hvalfjarðargöng lækki

Veggjald um Hvalfjarðargöng getur lækkað verulega ef Spölur ræðst í endurfjármögnun lána. Sturla Böðvarsson samgönguráðherra lýsti þessu yfir á Alþingi í dag og studdist þar við nýja úttekt Ríkisendurskoðunar á bókhaldi Spalar. Þetta kom fram í svari ráðherra við fyrirspurn Jóhanns Ársælssonar, þingmanns Samfylkingar, um hvaða aðgerðir væru fyrirhugaðar til að lækka virðisaukaskatt af veggjaldi gangnanna og hvort ráðherra myndi beita sér fyrir því að veggjaldið lækkaði. Samgönguráðherra sagði að lækkun virðisaukaskatts kæmi til skoðunar samfara endurskoðun á virðisaukaskattskerfinu í samræmi við stjórnarsáttmálann. Hann sagði að ráðuneytið hefði lagt á það áherslu í viðræðum við stjórn Spalar að allra leiða yrði leitað til að lækka veggjald í göngunum. Hann upplýsti að Ríkisendurskoðun hefði í sumar, að beiðni ráðuneytisins, farið yfir bókhald Spalar í því skyni að finna leiðir til að ná niður rekstrarkostnaði við göngin. Í skýrslu Ríkisendurskoðunar komi fram að draga megi verulega úr rekstrarkostnaðinum með endurfjármögnun lána. Samgönguráðherra sagði ennfremur að með hliðsjón af niðurstöðu Ríkisendurskoðunar sé ekkert því til fyrirstöðu að Spölur geri þær breytingar sem ættu að geta leitt til þess að veruleg lækkun yrði á gjaldinu.