Myrkrahöfðinginn til Brussel

Maðurinn sem eitt sinn var nefndur myrkrahöfðinginn vegna áhrifa sinna í breskum stjórnmálum kann að vera á leiðinni til Brussel til starfa hjá Evrópusambandinu. Sky fréttastofan greinir frá því að Peter Mandelson, sem var einn af mönnunum á bak við ris Verkamannaflokksins til valda, verði hugsanlega skipaður sem fulltrúi Breta í framkvæmdastjórn Evrópusambandsins. Þetta er sagt vera hluti af næstu uppstokkun Tony Blair forsætisráðherra á ríkisstjórn sinni. Mandelson hefur tvisvar þurft að segja af sér ráðherraembætti vegna hneykslismála.