Gíslar grátbiðja um miskunn

Sjö gíslar eru enn í haldi mannræningja í Írak. Myndband með gíslunum sýnir þá grátbiðja mannræningjana um að sýna sér miskunn. Gíslarnir vinna allir sem bílstjórar fyrir kúveiskt fyrirtæki. Mannræningjar krefjast þess að fyrirtækið hætti starfsemi í Írak; annars verði gíslarnir drepnir. Frá og með laugardegi ætla þeir að hálshöggva einn mann á þriggja sólarhringa fresti. Forsvarsmenn fyrirtækisins segjast ætla að gera allt sem í valdi þeirra stendur til að fá gíslana lausa. Gíslarnir koma frá Keníu, Indlandi og Egyptalandi. Mannræningjarnir krefjast auk þess að allir ríkisborgarar þessara landa, sem eru í Írak, fari frá landinu.