Vildu samstarf um árásir

Íranskir embættismenn settu sig í samband við al-Kaída eftir árás samtakanna á bandaríska herskipið Cole. Vildu írönsk stjórnvöld eiga samstarf við samtökin um árásir á Bandaríkin í framtíðinni að því er fram kemur á vef bandaríska vikublaðsins Time. Osama bin Laden er sagður hafa hafnað samstarfi af ótta við að það kynni að styggja stuðningsmenn samtakanna í Sádí-Arabíu. Að sögn tímaritsins er þetta meðal þess sem kemur fram í lokaskýrslu nefndarinnar sem hefur rannsakað aðdraganda árásanna. Skýrslan verður gerð opinber á fimmtudag. Tíu al-Kaídaliðanna sem rændu flugvélunum sem var flogið á World Trade Center og bandaríska varnarmálaráðuneytið 11. september 2001 fóru í gegnum Íran á leið sinni frá Afganistan til Bandaríkjanna að því er fram kemur í frétt Time. Þar segir að írönsk stjórnvöld hafi fyrirskipað landamæravörðum að hleypa al-Kaídaliðum inn í landið frá Afganistan án þess að stimpla vegabréf þeirra. Þeim hafi einnig verið skipað að gera ekkert til að hamla ferðalögum þeirra. Ekki hefur verið sýnt fram á að Íranar hafi vitað af árásunum fyrirfram.