Blóðugasti dagurinn til þessa

Gærdagurinn var sá blóðugasti það sem af er San Fermin hátíðinni í Pamplona þetta árið. Átta einstaklingar fengu að kenna á hornum nautanna sem þeir reyndu að hlaupa á undan og í það minnsta tíu til viðbótar meiddust með einum eða öðrum hætti. Hlaup gærdagsins fór ágætlega af stað en versnaði eftir því sem á leið. Verstur var lokaspretturinn. Hlaupararnir féllu hver um annan þveran í þröngum inngangnum að girðingunni þar sem safna átti nautunum saman í lok hlaupsins. Nautin gátu ekki annað en rutt sér leið í gegnum þröngina því á eftir þeim komu hundruð hlaupara sem þrýstu þeim áfram. Einn hlaupari var stunginn af nauti á sunnudag og tveir deginum áður. Fyrstu tvo dagana sluppu hlauparar við hornin en þeir fyrstu urðu fyrir þeim á föstudag, alls fjórir.