Strandaglópar á eyðieyju

Þrír ástralskir táningar syntu níu kílómetra að eyðieyju eftir að bát þeirra hvolfdi. Þaðan syntu þeir til annarrar eyjar þar sem þeir lifðu á kókósmjólk og ostrum í tæpa viku.  Saga táninganna þriggja er sannkölluð kraftaverkasaga. Þriðjudaginn 6. júlí voru þau ásamt foreldrum sínum á leið til afmælisveislu á eyju norðaustur af meginlandi Ástralíu þegar vél bátsins gaf sig. Veður versnaðir og bátnum hvolfdi. Eftir þriggja tíma volk hvöttu foreldrarnir krakkana, sem eru tíu, ellefu og fimmtán ára gömul, til að synda að næstu eyju. Eftir níu kílómetra sund, sem tók þrjá tíma, skriðu þau á land á hálfgerðum kletti þar sem þau héldu til án vatns og matar í þrjá daga. Þá ákvað bróðirinn að þau yrðu að synda lengra til að eiga von um að lifa af. Eftir nærri tveggja kílómetra sundferð um hafsvæði þar sem hákarlar eru í hundruðatali, náðu þau landi á eyðieyju, þar sem þau lifðu á ostrum og kókóshnetumjólk þar til á mánudaginn var, þegar þau fundust. Þau eru sögð við ótrúlega góða heilsu, en illa sólbrunnin auk þess sem þau ofþornuðu. Fagnaðarfundir urðu með þeim og ættingjum, en það skyggir hins vegar á gleðina að foreldranna og þriggja ára bróður er enn saknað og þau talin af.