Clinton skammaði repúblikana

Repúblikanar reyna að hræða óákveðna kjósendur frá John Kerry og reyna að hræða stuðningsmenn hans frá því að kjósa, sagði Bill Clinton, fyrrum Bandaríkjaforseti, þegar hann kom fram á kosningafundi með Kerry í gær. Clinton hóf þar þátttöku sína í kosningabaráttunni eftir langa sjúkralegu. Kerry var jafnvel harðorðari í garð repúblikana. "Ótrúlegur vanmáttur þessa forseta og þessarar ríkisstjórnar hefur skapað hættu fyrir hermenn okkar og kallað meiri hættu yfir þjóðina en ástæða er til," sagði hann um George W. Bush Bandaríkjaforseta og stjórn hans.