Allawi segir Írak á réttri leið

Iyad Allawi, forsætisráðherra Íraks, hélt ræðu á Bandaríkjaþingi í dag, þar sem hann sagði að lýðræði væri að komast á í landinu. Þrátt fyrir vandamál undanfarið og aftöku tveggja gísla væri ætlunarverkið á réttri leið. Allawi sagði meirihluta Íraka afar þakkláta fyrir að Saddam Hussein hafi verið komið frá völdum og leið landsmanna lægi upp á við. Hann sagði að ákvörðun Bandaríkjamanna að fara inn í Írak hafi verið erfið, en jafnframt rétt ákvörðun. Loks sagði Allawi að aldrei væri rétt að semja við mannræningja og það yrði ekki gert nú fremur en endranær.