Blair tíu ár í embætti

Tony Blair stóð í ströngu í gær, á tíu ára setuafmæli sínu sem forsætisráðherra Bretlands, við að verja framgang ríkisstjórnar sinnar á innlendum vettvangi sem og í Írak. Blair lofaði árangur ríkisstjórnar sinnar fyrir neðri deild breska þingsins og sagði hann einstakan í mörgum málum og nefndi sem dæmi að atvinnuleysi hafi aldrei verið minna, lágmarkslaun hafi verið tryggð og að vöxtum og verðbólgu hafi verið haldið í lágmarki. Íraksstríðið hefur þó reynst Blair erfiður ljár í þúfu og vinsældir hans hafa hríðfallið í kjölfar þess auk þess sem hann er berskjaldaður fyrir gagnrýni stjórnarandstöðunnar.