Qurie áfram forsætisráðherra

Forsætisráðherra Palestínu, Ahmed Qurie, hefur dregið afsögn sína til baka eftir að Yasser Arafat, forseti Palestínu, neitaði að samþykkja afsögnina. Arafat hefur mætt aukinni andstöðu á síðustu dögum og neitar að gefa eftir hervöld sín. Ahmed Qurei, sagði af sér í kjölfar þess að Arafat skipaði frænda sinn Moussa Arafat yfir öryggismál á heimastjórnarsvæðunum. Moussa hefði þar með öðlast völd yfir hernum sem nú falla einnig undir stjórn Arafats. Auk þess taldi Qurei að ástandið á Gaza einkenndist af stjórnleysi og að Arafat væri ekki að gera það sem í valdi hans stæði til að stemma stigu við ofbeldi né að hann einbeitti sér nægjanlega að umbótum til að bæta líf fólks á heimastjórnarsvæðunum. Þetta er ekki í fyrsta sinn sem Arafat er sakaður um að hafa ekki haft hagsmuni almennra borgara í fyrirrúmi og hann hefur þótt heldur ósveigjanlegur þegar sest hefur verið að samningaborðinu. Eftir mótmælagöngur í Gaza gaf Arafat eftir og tók stöðuveitingu frænda síns til baka. Qurei hefur fengið leyfi til að stokka upp í ríkisstjórninni og Bandaríkjastjórn og Sameinuðu Þjóðirnar reyna nú að fá Arafat til þess að samþykkja að yfirstjórn hersins verði færð undan hans persónulega valdi og yfir til miðstjórnar palestínsku heimastjórnarinnar. Arafat þykir ekki líklegur til þess að gefa eftir öryggisveitirnar því hann telur þær vera of mikilvægan hluta af valdi sínu. Mikið hefur verið talað um það að vinsældir Arafats hafi dvínað en þátttaka í mótmælum um helgina var ekki mikil, einungis um nokkur hundruð manns safnaðist saman á götum úti. Flestir þeirra tilheyrðu reyndar hreyfingu Arafats, Fatah hreyfingunni sem voru að berjast gegn aukinni spillingu. Almennt er þó talið að Palestínumenn álíti Arafat enn réttkjörinn leiðtoga sinn. Kofi Annan sagði við fréttamenn í gær að hann teldi tíma vera kominn fyrir Arafat að setjast niður og hlusta á aðra meðlimi í ríkisstjórnar Palestínu. Bandaríkjastjórn segir Arafat ekki vera hjálplegan í því að reyna að koma á friði á heimastjórnarsvæðunum. Að sögn Saeb Erakat, aðalsamningamanni Palestínustjórnar eru Palestínumenn orðnir langþreyttir á slæmum lífsgæðum og vilja nú umfram allt sjá umbætur.