Arafat stal milljörðum

Fyrrverandi gjaldkeri PLO samtaka Yassers Arafats, segir að leiðtoginn hafi stolið milljörðum króna úr sjóðum þeirra. Jawid al Ghussein var gjaldkeri PLO í tólf ár, en varð að flýja land fyrir tveim árum, eftir að hafa sakað leiðtoga samtakanna, opinberlega, um spillingu. Hann leysti frá skjóðunni í viðtali við þýska sjónvarpsstöð í gær, al Ghussein sagði að Arafat sé sá eini sem viti um bankareikninga sem PLO og Fatah hreyfingin eigi, út um allan heim. Hann sé líka í mörgum tilfellum sá eini sem hafi prókúru á þessa reikninga. Gjaldkerinn fyrrverandi sagði meðal annars frá því að í desember árið 2001 hafi Arafat lagt 380 milljónir króna af peningum PLO inn á einkareikning í banka í Kaíró. Þeir peningar hafi síðar verið notaðir til þess að kaupa einkaþotu, fyrir Arafat. Al Ghussein sagði einnig að aðrir leiðtogar PLO hafi hirt gríðarlegar fúlgur af reikningum samtakanna, til eigin nota.