Gíslinn laus úr haldi

Filippeyski gíslinn, Angelo de la Cruz, 46 ára bílstjóri, er laus úr haldi mannræningja í Írak. Hann var afhentur stjórnarerindrekum í sendiráði Sameinuðu Arabísku furstadæmanna í morgun. Forseti Filippseyja, Gloria Arroyo, talaði við Cruz í síma og segir að hann sé við góða heilsu. Síðustu filippeysku hermennirnir fóru frá Írak í gær vegna hótana um að ella yrði gíslinn tekinn af lífi. Arroyo var harðlega gagnrýnd fyrir að láta undan kröfum mannræningja, en hún varði ákvörðun sína með því að benda á að Cruz væri saklaus faðir átta barna, sem ætti skilið að halda lífi. Á blaðamannafundi í morgun þakkaði hún guði fyrir að málið hefði fengið farsælan endi og sagðist viss um að hún hefði breytt rétt. Bandaríkjastjórn hefur gagnrýnt Filippseyinga harðlega fyrir að hafa gefið eftir í baráttunni við hryðjuverkamenn. Forsetinn sagði hins vegar að hvert mannslíf væri verðmætt og að Cruz væri engin undatekning í þeim efnum og því hefði henni borið skylda til að gera allt sem í hennar valdi stæði til að bjarga honum frá hræðilegri aftöku. Fá ríki hafa viljað tjá sig um málið en Suður Kórea varð til að mynda ekki við kröfu mannræningja um að hverfa frá Írak með þeim afleiðingum að Suður Kóreumaður var tekinn af lífi. Kona Angelo de la Cruz þakkaði í dag mannræningjunum fyrir að láta mann sinn lausan og skaða hann ekki. Hún bíður nú eftir að fá að hitta mann sinn í sendiráði Filippseyja í Jórdaínu.