Bráðnun jökla mikil ógnun

Nægur koltvísýringur er í andrúmsloftinu í dag til að bræða alla jökla heimsins og sökkva borgum á borð við New York, London og New Orleans á stuttum tíma. Hefur álíka magn koltvísýrings ekki fundist í 55 milljón ár hér á jörðu. Þetta lét David King, aðalráðgjafi breskra stjórnvalda í umhverfismálum hafa eftir sér en hann ferðast nú um og þrýstir á að þau ríki sem ekki hafi nú þegar skrifað undir Kyoto bókunina til verndar umhverfinu geri það. Vísindamenn þykjast vissir í sinni sök þegar fullyrt er að íshellan yfir Grænlandi muni byrja að bráðna á þessari öld. Bráðni hún alveg mun sjávarmál hækka um sjö metra og skapa stærra vandamál en mannkynið hefur áður kynnst. Fjöldi stórborga í heiminum mun sökkva í sæ, þar meðtaldar stórborgir á borð við London, Los Angeles, Kaíró og Sidney. Öll austurströnd Bandaríkjanna færi að hluta til undir vatn og hætt er við að vöðlur verði nauðsynlegar ætli fólk sér í miðbæ Reykjavíkur. Fari spár á versta veg er einnig hætt við að heilu löndin fari forgörðum. Bangladesh er líklegt til að hverfa af landakortum og þarf sjávarmál í raun aðeins að hækka um einn metra til að stór hluti þess hvíli á hafsbotni. Flóðgarðar Hollands, sem er að mestu undir sjávarmáli, eru ekki byggðir með sjö metra hækkun í huga og Danmörk og Belgía liggja hvorug hátt yfir sjó. Þá á eftir að minnast á þær truflanir sem slík hækkun hefur á vistkerfi sjávar en rannsóknir benda til að hækkun geti haft miklar og slæmar afleiðingar fyrir sjávarþjóðir. Sem dæmi þyrftu Íslendingar að sækja fisk mun norðar en nú gerist þar sem einu köldu svæðin sem eftir væru yrðu við pólana tvo. Þá eru og ótalin þau áhrif sem verða á veröldina eins og við þekkjum hana ef heimskautaísinn á Suðurskautinu bráðnar einnig. Þá gera vísindamenn ráð fyrir að yfirborð sjávar hækki um 110 metra til viðbótar við þá sjö frá Grænlandsjökli.