Atast í Pink í Austurríki

Auðunn Blöndal er nú staddur út í Graz ásamt þeim Pétri Jóhanni og Huga Jens (Ofurhuga) í 70 mínútum. Þar ætla piltarnir að hitta tónlistarkonuna Pink en hún verður með tónleika á Íslandi 10 og 11. ágúst. "Tónleikahaldararnir á Íslandi höfðu samband við Pink og hennar lið hér úti og fengu það í gegn að við mættum koma til Austurríkis til að fara á tónleika með henni og taka svo viðtal við hana eftir á," segir Auðunn sem flaug út með strákunum í gær og kemur til með að spjalla við Pink á laugardaginn. "Pink er jú engin Sugababes gella," segir Auðunn aðspurður um hvort hann hræðist söngkonuna. "Hún virkar svolítil trukkalessa á okkur, klæðist alltaf leðri og gæti verið svolítið hörð í horn að taka. En við erum þrír og hún er ein þannig að við erum ekkert mjög hræddir og við ætlum að gera allt sem við getum til að atast í henni." Það er ný upplifun fyrir strákana í 70 mínútum að koma til Graz. "Enginn okkar hefur komið hingað og Sveppi greyið er alveg í rusli yfir því að hafa ekki komist með en hann er að fara að sýna Fame á fimmtudag, föstudag og laugardag. Það eina sem ég vissi um landið áður en ég kom hingað er að Arnold Schwartzenegger fæddist hér en við erum svo bara hérna úti að steikja í íbúum Austurríkis, ætlum að gera falda myndavél og koma heim með fullt af sprelli," segir Auðunn. En hvaða heimsfrægu poppstjörnur skildu strákarnir í 70 mínútum ætla að tala við næst? "Við stefnum á að taka viðtal við 50 cent þegar þeir koma til Íslands. Það er þó spurning hvort maður þori nokkuð að atast í þeim. Það er búið að skjóta 50 cent níu sinnum um ævina og ég hef því á tilfinningunni að hann sé ekkert sérstaklega hræddur við þrjá vitleysinga úr 70 mínútum."