Líbíumenn samþykkja bótagreiðslur

Stjórnvöld í Líbíu hafa samþykkt að greiða bætur til rúmlega 160 fórnarlamba sprengjuárásar á skemmtistað í Berlín í Þýskalandi árið 1986. Þýskir dómstólar úrskurðuðu fyrir þremur árum að líbíska leyniþjónustan hafi staðið fyrir tilræðinu og fjórir menn voru þá dæmdir til fangavistar. Samkomulagið nær aðeins til fórnarlamba sem ekki eru bandarísk því kröfu um bótagreiðslur til bandarískra ríkisborgara er nú fyrir dómstólum þar í landi. Tveir Bandaríkjamenn og ein tyrknesk kona létust í sprengingunni og rúmlega 200 manns særðust. Sendiherra Líbíu í Þýskalandi segir að skrifað verði undir staðfestingu á bótagreiðslunum í Berlín í kvöld, og að tveimur vikum liðnum verði skrifað undir formlegan samning þar að lútandi, en um er að ræða 35 milljónir dollara. Myndin er af rústum skemmtistaðarins í Berlín í apríl 1986.