Hinn 18 ára Breki Ómarsson skoraði tvívegis þegar ÍBV vann 4-1 sigur á KH í 32-liða úrslitum Borgunarbikars karla á Hásteinsvelli í kvöld.
Þótt sigurinn hafi á endanum verið öruggur tók það Eyjamenn tæpan klukkutíma að brjóta 4. deildarliðið á bak aftur.
Kaj Leo í Bartalsstovu kom ÍBV á bragðið þegar hann skoraði beint úr aukaspyrnu á 57. mínútu.
Á 68. mínútu kom Breki inn á sem varamaður og fimm mínútum síðar skoraði hann eftir sendingu frá Kaj Leo. Breki skoraði svo sitt annað mark á 84. mínútu.
Aðeins tveimur mínútum síðar skoraði Pablo Punyed fjórða mark Eyjamanna. Ólafur Andri Þórarinsson minnkaði muninn í 4-1 á lokamínútunni en nær komust Hlíðarendapiltar ekki.
Upplýsingar um úrslit og markaskorara eru fengnar frá Fótbolta.net.
Hlíðarendapiltar héldu í við Eyjamenn í klukkutíma

Tengdar fréttir

Dönsku KR-ingarnir sáu um Leiknismenn
KR er komið áfram í 16-liða úrslit Borgunarbikars karla eftir 1-4 sigur á Leikni F. fyrir austan í kvöld.

Þórsarar úr leik eftir tap fyrir Ægismönnum
Matraðarbyrjun Þórsara á tímabilinu heldur áfram en í kvöld féll liðið úr leik fyrir 3. deildarliði Ægis á heimavelli í 32-liða úrslitum Borgunarbikars karla.