Umfjöllun: Ísland - Síle 25-17 | Skylduverki lokið

Ísland vann öruggan átta marka sigur á Síle í fyrsta leik liðanna í forkeppni Ólympíuleikanna. Mestu munaði um góðan kafla í upphafi seinni hálfleiks og markvörslu Björgvins Páls Gústavssonar.

Staðan í hálfleik var 12-7, Íslandi í vil. Sigurinn var aldrei í hættu en Síle spilaði á köflum ansi villtan handbolta sem strákarnir lentu stundum í basli með.

Björgvin Páll varði sautján skot í leiknum, þar af öll þau þrjú víti sem Sílemenn fengu í leiknum. Guðjón Valur Sigurðsson var markahæstur Íslendinganna með tíu mörk og átti mjög góðan leik.

Ólafur Stefánsson spilaði sinn fyrsta mótsleik í langan tíma fyrir Ísland og komst almennilega í gang í seinni hálfleik. Alls skoraði hann fjögur mörk í leiknum, rétt eins og Snorri Steinn Guðjónsson. Báðir misstu af EM í Serbíu.

Varnarleikurinn var á löngum köflum fínn enda skoruðu Sílemenn aðeins tólf mörk á fyrstu 50 mínútum leiksins.

Strákarnir náðu snemma forystu í leiknum og létu hana aldrei af hendi. Þó náðu þeir ekki að hrista Suður-Ameríkumennina almennilega af sér fyrr en í upphafi seinni hálfleiks. Strákarnir byrjuðu þá tveimur mönnum færri en eftir að Ísland fékk sína menn aftur inn á skoruðu okkar menn átta af næstu níu mörkum leiksins og gerðu algjörlega út um hann.

Á þessum kafla var íslenska vörnin og markvarsla Björgvins Páls frábær og sýndu strákarnir á þessum mínútum hversu öflugir þeir eru þegar þeim gengur allt í haginn.

Annars var forvitnilegt að fylgjast með þessum leik á köflum. Sílemenn spiluðu á köflum villtan varnarleik og skapaðist oft hálfgerð ringulreið á vellinum. Liðin töpuðu boltanum rúmlega 40 sinnum í leiknum sem segir sitt.

Niðurstaðan eftir þennan leik er að strákarnir þurfa að halda betur á spilunum gegn Japan á morgun enda um mun öflugari andstæðing að ræða en sá sem strákarnir mættu í dag. Strákarnir okkar eru án nokkurs vafa betri í handbolta en það verða þeir þá að sýna í leiknum á morgun.