Fleiri fréttir

Fjörutíu prósent lána í vanskilum

Um 40 prósent útlána stóru bankanna þriggja eru í alvarlegum vanskilum, en hlutfallið hefur lítið breyst síðasta árið. Seðlabankastjóri segir það ekki endilega áfellisdóm yfir skuldaúrræðum banka og stjórnvalda.

Flýta rannsóknarborunum á Norðausturlandi

Stjórnir Landsvirkjunar og Þeistareykja ehf. hafa ákveðið að auka verulega við rannsóknir vegna undirbúnings jarðgufuvirkjana á Norðausturlandi í sumar. Markmiðið er að flýta öflun upplýsinga um afkastagetu jarðhitasvæðanna í Bjarnarflagi og á Þeistareykjum til að mæta aukinni eftirspurn væntanlegra orkukaupenda á svæðinu.

Lífeyrissjóðir ganga frá kaupum á 25% í HS Orku

HS Orka hf. hefur tilkynnt Kauphöllinni um sölu Magma Sweden á 25% hlut í HS Orku hf. til Jarðvarma slhf. sem er í eigu 14 íslenskra lífeyrissjóða. Áður hafði verið getið um mögulega samninga á milli aðila þann 18. apríl 2011 og nú hefur verið skrifað undir samninga um kaupin.

Tæplega 25 þúsund á vanskilaskrá

Tæplega 25 þúsund einstaklingar voru á vanskilaskrá í lok apríl 2011 og hefur sá fjöldi farið hratt vaxandi síðustu mánuði. Hann hefur vaxið um þriðjung síðan j í mars 2009. Þetta kemur fram í skýrslu Seðlabanka Íslands um fjármálastöðugleika.

Breytingar á kvótakerfinu gætu veikt bankana

Breytingar á fiskveiðistjórnunarkerfinu gætu veikt sjávarútvegsfyrirtæki og þar með rýrt lánasöfn viðskiptabankanna. Þetta kemur fram í skýrslu Seðlabankans um fjármálastöðugleika, sem seðlabankastjóri er í þann mund að kynna.

Fyrirtækjum í skuldavanda fækkar ekki

Lánum fyrirtækja í vanskilum hefur nánast ekkert fækkað frá því í lok árs 2010. Þetta kemur fram í skýrslu Seðlabanka Íslands um fjármálastöðugleika. Heildarlán í óskilum voru rétt rúmlega 40% af öllum lánum í árslok 2009, en voru slétt 40% í mars síðastliðnum.

Skortur á fólki með tæknimenntun hamlar hagvexti

"Fjöldi fyrirtækja getur ekki vaxið á Íslandi í dag vegna skorts á tæknimenntuðum starfskröftum og erum við þannig að missa af aukinni verðmætasköpun og hagvexti," segir Ari Kristinn Jónsson, rektor Háskólans í Reykjavík. Að sögn Ara er raunveruleg og alvarleg hætta á því að fyrirtæki ákveði að flytja starfsemi sína í heild eða að hluta til erlendis, til að tryggja vaxtarumhverfi sitt. Heilsíðuauglýsingar birtist í blöðum í gær þar sem forstjórar 27 stórra íslenskra fyrirtækja hvöttu ungmenni til að sækja í tækninám vegna fyrirsjáanlegs skorts á fólki í þeim greinum á komandi árum. Háskólinn í Reykjavík útskrifar um tvo þriðju hluta alls tækni- og verkfræðimenntaðs fólks á Íslandi. Ari Kristinn segir að undanfarin ár hafi eftirspurn eftir fólki með þessa menntun stóraukist hér á landi. "Ástæður má meðal annars rekja til vaxandi hugverkaiðnaðar á Íslandi og auknu hlutverki tækni í fjölmörgum þáttum atvinnulífsins. Fjöldi þeirra sem útskrifast árlega á Íslandi með tæknimenntun hefur einnig vaxið og má meðal annars rekja það til stöðugrar fjölgunar tækninemenda við Háskólann í Reykjavík sem í dag útskrifar tvo af hverjum þremur með tæknimenntun á háskólastigi. Staðreyndin er hins vegar sú að þessi aukning hefur engan veginn haldið í við vaxandi þörf, enda útskrifast hlutfallslega færri með tæknimenntun hér en í mörgum samkeppnislöndum okkar." Að sögn Ara þarf að grípa til viðeigandi ráðstafana til að tryggja hagvöxt. "Það er nauðsynlegt fyrir efnahag okkar að tæknimenntun verði efld til muna og tæknimenntuðum í atvinnulífinu fjölgað verulega. Til þess þarf annars vegar að tryggja að þeir háskólar sem útskrifa tæknimenntaða nemendur hafi bolmagn til að standa vel að náminu, bæði varðandi aðstöðu og fjármögnun námsins. Hins vegar þarf að hvetja framtíðarháskólanema til að horfa til tæknináms sem góðs kosts til framtíðar, enda skapi það þeim góða samkeppnisstöðu um leið og það eflir íslenskt atvinnulíf," segir hann.

Hafa safnað hátt í 30 milljónir fyrir bændur

Safnast hafa 25 - 30 milljónir í söfnun sem fyrirtæki í landinu standa að í samvinnu við Samtök atvinnulífsins vegna eldgossins í Grímsvötnum. Samtök atvinnulífsins segja að fjöldi fyrirtækja hafi lagt málinu lið.

Lundin að léttast hjá Íslendingum

Svo virðist sem væntingar neytenda hafi heldur betur glæðst nú í maí ef marka má Væntingavísitölu Gallup sem birt var í morgun. Að þessu sinni hækkaði vísitalan um tæp 11 stig á milli mánaða og mælist gildi hennar nú 66,3 stig.

Stórbankar undirbúa íslenska skuldabréfaútgáfu

Þrír erlendir stórbankar munu halda fundi með fjárfestum dagana 1. til 8. júní þar sem þessum fjárfestum verður kynnt útgáfa íslenskra skuldabréfa í erlendum gjaldeyri á alþjóðamörkuðum. Bankarnir sem hér um ræðir eru Barclays Capital, Citigroup og UBS.

Þjónustujöfnuður við útlönd neikvæður um 2,2 milljarða

Útflutningur á þjónustu á fyrsta ársfjórðungi 2011 var, samkvæmt bráðabirgðatölum, 58,2 milljarðar en innflutningur á þjónustu 60,4 milljarðar króna. Þjónustujöfnuður við útlönd á fyrsta ársfjórðungi var því neikvæður um 2,2 milljarða króna.

Verðbréfaviðskiptin neikvæð í mars

Nettó verðbréfaviðskipti milli innlendra og erlendra aðila voru neikvæð um 11 milljarða kr. í mars 2011. Þetta kemur fram í hagtölum Seðlabankans.

Fannst lánin óeðlileg en afgreiddi þau samt

Ragnar Z. Guðjónsson, fyrrverandi sparisjóðsstjóri Byrs, gekkst við því fyrir rétti í gær að hafa þótt óeðlilegt og óþægilegt að láta sjóðinn lána félaginu Exeter Holding milljarð króna til að leysa sjálfan sig og aðra starfsmenn og stjórnarmenn Byrs úr skuldaklemmu. Með lánunum var allri áhættu komið af herðum þeirra og MP banka, yfir á Byr.

Nýr mannauðsstjóri hjá Skýrr

Ægir Már Þórisson hefur verið ráðinn forstöðumaður mannauðssviðs Skýrr og þegar tekið til starfa. Eins og fram kemur í tilkynningu frá Skýrr kemur Ægir Már kemur til fyrirtækisins frá Capacent þar sem hann hefur starfað frá árinu 2001, sem ráðgjafi, mannauðsstjóri árin 2005-2009 og framkvæmdastjóri ráðgjafar undanfarin tvö ár.

Mikill vöxtur kallar á fólk

27 forstjórar stórra fyrirtækja í íslensku atvinnulífi hvöttu í dag ungmenni til að sækja í tækninám þar sem fyrirsjáanlegt er að skortur verði á fólki í þeim greinum á komandi árum.

Um þúsund sóttu um Landsbankastyrki

Sextán námsmenn fengu í dag úthlutað námsstyrk frá Landsbankanum en styrkirnir eru nú veittir í 22. sinn. Aldrei hafa borist eins margar umsóknir og í ár eða rétt um 1000 umsóknir bárust um styrkina, sem eru á bilinu 200 – 400 þúsund krónur.

Útboð Seðlabankans styrkir aflandsgengi krónunnar

Aflandsgengi krónunnar hefur styrkst verulega í dag. Styrkingin hófst raunar í lok síðustu viku þegar Seðlabankinn kallaði eftir tilboðum í íslenskar krónur gegn greiðslu í reiðufé í erlendum gjaldeyri.

Íslenskur hugbúnaður fær alþjóðleg verðlaun

Íslenskur hugbúnaður, City Direct frá ICEconsult, hafnaði í öðru sæti í alþjóðlegri samkeppni, „Future Internet Summit Award“, sem haldin er í tengslum við ráðstefnuna „European Summit on the Future Internet“. Markmið hennar er leita uppi nýjar lausnir sem eru líklegar til að hafa afgerandi áhrif á mótun notkunar á internetinu í framtíðinni á ákveðnum sviðum.

Exeter: Styrmir segist ekki hafa haft ítök í BYR

Styrmir Bragason, fyrrverandi forstjóri MP banka, segist ekki hafa verið með nein ítök í BYR sparisjóði sem gætu hafa haft áhrif á viðskipti með stofnfjárbréf í BYR sparisjóði. Þetta kom fram í máli Styrmis þegar hann gaf skýrslu fyrir Héraðsdómi Reykjavíkur í Exetermálinu í morgun.

Exeter: Vísa ábyrgð hvor á annan

Skýrslutökum yfir tveimur af sakborningum í Exetermálinu svokallaða er lokið. Aðalmeðerð málsins hófst formlega í Héraðsdómi Reykjavíkur hófst í morgun. Jón Þorsteinn Jónsson, fyrrverandi stjórnarformaður Byrs, var fyrstur til að bera vitni í málinu. Næstur bar Ragnar Z. Guðjónsson sparisjóðsstjóri vitni. Nú rétt eftir klukkan hálf tólf hófst svo skýrslutaka af Styrmi Bragasyni, fyrrverandi forstjóra MP, banka.

Bláa skatan ekki lengur tákn Bylgjunnar á Ólafsvík

Bláa skatan, sem verið hefur tákn fiskiðjunnar Bylgjunnar á Ólafsvík um lengri tíð, kveður en í hennar stað auðkennir nýtt merki, Bylgjufiskur, fyrirtækið og afurðir þess. Nýja merkið er fiskur samansettur úr sjávarbylgjum í mismunandi bláum litum og íslensku fánalitunum.

Skuldsetning Sandgerðis nemur 5,5 milljörðum

Skuldir og skuldbindingar Sandgerðisbæjar eru samtals 5.415 milljónir króna að meðtöldum leiguskuldbindingum, að því er fram kemur í fréttatilkynningu. Segir einnig að skuldsetning sveitarfélagsins sé mikil og vinna þurfi frekar að hagræðingu í rekstri og öðru.

Saga flytur suður til borgarinnar

Saga Fjárfestingarbanki mun flytja höfuðstöðvar sínar frá Hafnarstræti 53 á Akureyri að Höfðatorgi í Reykjavík frá og með 1. júlí nk.

Exeter: Stjórnarformaður vísar ábyrgð á forstjóra

Jón Þorsteinn Jónsson, fyrrverandi stjórnarformaður Byrs sparisjóðs vísar frá sér allri ábyrgð á lánum í Exetermálinu svokallaða. Hann segir að þáverandi forstjóri Byrs, Ragnar Z. Guðjónsson hafi borið ábyrgð á lánamálum og haft heimild til að veita lán upp að allt að 1,5 milljarði króna. Aðalmeðferð í málinu hófst í Héraðsdómi Reykjavíkur í morgun og er dómurinn fjölskipaður.

The Economist: Eldgosið hefur jákvæð áhrif fyrir Íslendinga

„Það er betra fyrir Ísland vera þekkt fyrir náttúrufegurð og hættu heldur en að vera þekkt sem Wall Street á túndrunni ," segir tímaritið The Economist, sem fjallar um eldgosið í Grímsvötnum og viðbrögð íslenskra stjórnvalda og Icelandair við þeirri röskun sem varð á flugumferð.

Misræmi í endurreikningum bílalána

Fjármálafyrirtæki beita tveimur ólíkum aðferðum við endurreikninga á gengistryggðum bílalánum. Skeikar þar á bilinu þrjú til fimm prósent af upphaflegum höfuðstóli.

Fjölbreytt sam-vinna í tvö ár

Harpa og Icelandair undirrituðu í gær samstarfssamning til tveggja ára. Markmiðið er að fjölga ráðstefnu- og menningarferðamönnum sem koma til landsins og vekja athygli á Íslandi sem spennandi alþjóðlegum áfangastað.

Atvinnulausir fái desemberuppbót

Atvinnuleysi mældist 8,1 prósent í apríl. Atvinnulausum fækkaði því um 0,5 prósentustig milli mánaða. Atvinnulausir voru að meðaltali 13.262 í mánuðinum. Á höfuðborgarsvæðinu mældist atvinnuleysi 8,7 prósent en á landsbyggðinni var það 6,9 prósent. Meðal karla var atvinnuleysi 8,6 prósent en kvenna 7,4 prósent. Þá hefur 59 prósent atvinnulausra verið það í meira en sex mánuði.

Ebay og Paypal stefna Google

Uppboðssíðan ebay og greiðslusíðan Paypal hafa stefnt Google og tveimur starfsmönnum fyrirtækisins fyrir að stela viðskiptaleyndarmálum sem varða greiðslukerfi í gegnum farsíma.

Lífeyrissjóðir umfangsmiklir í Össurkaupum

Tveir lífeyrissjóðir voru umfangsmiklir þegar Eyrir Invest seldi allan hlut sinn í Össur hf. í dag. Samanlagt keyptu þeir hátt í helminginn af þeim hlutabréfum sem voru í boði.

Lítil rök fyrir Íbúðalánasjóði

"Það eru lítil rök fyrir því að reka Íbúðalánasjóð ef hann getur ekki mætt fólki í vanda með sama hætti og fyrirtæki á markaði," segir efnahags- og viðskiptaráðherra. Engin áform eru samt uppi um að sjóðurinn veiti sömu úrræði vegna fasteignalána og Landsbankinn þótt báðir séu í eigu ríkisins.

Segir skattgreiðendur borga brúsann

Höskuldur Ólafsson, forstjóri Arion banka, segir að bankinn muni skoða þær hugmyndir sem Landsbanki Íslands kynnti fyrir viðskiptavinum sínum í gær. Í hugmyndunum felst meðal annars 20% vaxtaafsláttur fyrir lánþega bankans.

"Geðþóttamat" hjá FME - Ingólfur sætir ekki rannsókn

Ingólfur Guðmundsson gerir alvarlegar athugasemdir við tilkynningu Fjármálaeftirlitsins þar sem birtur er rökstuðningur FME fyrir því að Ingólfur hafi þurft að víkja sem framkvæmdastjóri Lífeyrissjóðs verkfræðinga. Ingólfur er meðal annars ósáttur við að FME haldi því fram að hann hafi gefið stofnuninni rangar upplýsingar þegar hann sendi til hennar gögn sem áttu að liggja til grundvallar mati á hæfi hans. "Ef FME taldi svar mitt vísvitandi rangt hefði stofnunin átt að vísa málinu til rannsóknar hjá lögreglu. Það var ekki gert sem segir meira en mörg orð," segir Ingólfur. Að sögn Ingólfs var þarna um að ræða athugasemdir FME vegna svars hans á eyðublaði um hæfisupplýsingar þess efnis um hvort hann hafi sætt opinberri rannsókn. Ingólfur ítrekar að hann hafi aldrei sætt opinberri rannsókn og að þannig hafi hann svarað spurningunni, sannleikanum samkvæmt. Vísir sagði í morgun frá því að FME hefði loks birt gagnsæistilkynningu vegna mats á hæfi Ingólfs sem framkvæmdastjóri Lífeyrissjóðs verkfræðinga. Ingólfur þurfti síðasta haust að víkja úr stöðunni vegna mats stjórnar FME. Eins og Vísir greindi frá hefur Ingólfur stefnt FME vegna ákvörðunarinnar og krefst hann þess að henni verði hnekkt. FME krafðist frávísunar, á þeim grundvelli að Ingólfur væri hættur störfum, en með úrskurði Héraðsdóms Reykjavíkur þann 16. maí var þeirri kröfu FME hafnað. Ingólfur lítur svo á að fagleg sjónarmið hafi ekki verið uppi þegar matið var gert. "Þessi ákvörðun byggir á geðþóttamati embættismanna á störfum mínum í stjórn Íslenska lífeyrissjóðsins. Þetta mat er rangt og hefur mál verið höfðað til ógildingar ákvörðunarinnar fyrir dómstólum," segir í athugasemdum sem Ingólfur sendi fréttastofu vegna málsins. "Framganga FME í þessu efni er nokkuð sérstök í ljósi umfjöllunar stjórnar FME um svar Gunnars Andresen, fyrir hönd Landsbankans, um erlenda starfsemi bankans þann 26. júní 2001, þar sem m.a. aflandsfélaga á Guernsay er hvergi getið þó hann væri stjórnarformaður a.m.k. eins slíks fyrirtækis," segir í athugasemdum Ingólfs, en Gunnar Andersen er forstjóri FME. Þá hafnar Ingólfur því algjörlega að Landsbanki Íslands sem var rekstraraðili Íslenska lífeyrissjóðsins hafi skilað inn röngum skýrslum til FME varðandi fjárfestingar í einstökum verðbréfum, og segir hann að stjórn lífeyrissjóðsins, þar sem hann var sjálfur stjórnarformaður, hafi sinnt hlutverki sínu vel. FME gerði einnig athugasemdir við breytingu stjórnar lífeyrissjóðsins á fjárfestingarstefnu einnar ávöxtunarleiðar sjóðsins og segir í mati FME að fé hafi verið flutt yfir í áhættumeiri fjárfestingakosti. Ingólfur segir einfaldlega rangt að sú leið sem farin var hafi verið áhættumeiri. Ingólfur segir ennfremur að sjóðfélagar hafi verið upplýstir um breytinguna, þvert á það sem FME heldur fram, og að rangt sé að breytingin hafi verið háð samþykki fjármálaráðherra eða sjóðfélagar. "Fullyrðing þessi er sett fram í vondri trú, því að fyrir liggur bréf Fjármálaráðuneytisins þann 31. janúar 2011 til FME þar sem þetta kemur skýrt fram," segir Ingólfur.

Hirða hærri vexti af bílalánum

Landsbankinn, Íslandsbanki, Arion banki, Byr og Drómi reikna öll húsnæðislán með sama hætti. Drómi og Avant reikna bílalán sömuleiðis með sömu aðferð. SP-fjármögnun, Lýsing og Íslandsbanki reikna bílalán hins vegar með örðum hætti sem gefa nokkuð hærri eftirstöðvar. Þetta kemur fram í greinargerð sem Raunvísindastofnun gerði fyrir Umboðsmann Skuldara.

ÍLS getur ekki boðið sömu kjör og Landsbankinn

Íbúðalánasjóður stendur ekki vel og vart á hann leggjandi að krefjast þess að hann bjóði sömu úrræði og Landsbankinn býður viðskiptavinum sínum. Þetta sagði Jóhanna Sigurðardóttir forsætisráðherra á Alþingi í dag.

Viðskiptabankarnir afskrifuðu 480 milljarða á tveimur árum

Viðskiptabankarnir afskrifuðu 480 milljarða íslenskra króna af lánum fyrirtækja sem voru í viðskiptum við þá á á árunum 2009-2010. Þetta kemur fram í svari fjármálaráðherra við fyrirspurn Gunnars Braga Sveinssonar á Alþingi sem vildi vita hve mikið fé er talið hafa tapast vegna gjaldþrota eða afskrifta hjá fyrirtækjumí helstu atvinnugreinum á árunum 2006-2010. Hann vildi jafnframt vita hverjar væru forsendur útreikninganna.

Sjá næstu 50 fréttir

Mest lesið