Sleppur við lögregluákæru

Varnarmaðurinn Ben Thatcher hjá Manchester City sleppur með skrekkinn við lögregluákæru eftir líkamsárás sína á Pedro Mendes, leikmann Portsmout, í leik liðanna fyrir nokkrum vikum. Mendes óskaði eftir því á sínum tíma að farið yrði með málið innan knattspyrnuhreyfingarinnar og það er talið hafa orðið til þess að lögregluyfirvöld hafa nú ákveðið að blanda sér ekki í málið.

Ráðstefna Knattspyrnuþjálfarafélags Íslands og KSÍ

Ráðstefna í tengslum við úrslitaleik VISA-bikars karla Knattspyrnuþjálfarafélag Íslands (KÞÍ) í samvinnu við Knattspyrnusamband Íslands heldur sína árlegu ráðstefnu í tengslum við VISA-bikarúrslitaleik karla þann 30. september næstkomandi.

Shevchenko og Bellamy eru enn ekki farnir að skora

Glenn Roeder, stjóri Newcastle, var skiljanlega sáttur við frammistöðu framherjans Obafemi Martins í kvöld þegar hann skoraði bæði mörk liðsins í sigrinum á eistneska liðinu Levadia Tallin á St James Park.

Úrslitin gefa ekki rétta mynd af leiknum

Alan Pardew var að vonum vonsvikinn með niðustöðuna í kvöld þegar hans menn í West Ham steinlágu 3-0 fyrir ítalska liðinu Palermo frá Sikiley í Evrópukeppni félagsliða og eru því úr leik samtals 4-0. Pardew sagði úrslitin gefa óraunhæfa mynd af leiknum.

Woods í stuði á heimsmótinu

Bandaríski stjörnukylfingurinn Tiger Woods hristi heldur betur af sér vonbrigðin í Ryder keppninni í kvöld þegar hann lék fyrsta hringinn á heimsmótinu sem fram fer á Englandi á 63 höggum eða 8 undir pari. Woods hefur eins höggs forystu á Ian Poulter og Padraig Harrington. Woods hefur fjórum sinnum unnið sigur á mótinu.

Jay Williams snýr aftur

Leikstjórnandinn Jay Williams hefur skrifað undir samning við New Jersey Nets í NBA deildinni en hann hefur ekki spilað leik í þrjú ár eftir að hafa lent í mjög alvarlegu bifhjólaslysi í júní árið 2003.

Tim Borowski meiddur

Þýski landsliðsmaðurinn Tim Borowski hjá Werder Bremen verður frá keppni í tvær til þrjár vikur að sögn lækna félagsins eftir að hann meiddist á fæti í leiknum gegn Barcelona í gærkvöldi. Þetta þýðir að Borowski mun missa af leik Þjóðverja og Georgíu í byrjun næsta mánaðar - sem og næsta leik Bremen í Evrópukeppninni.

Góður sigur hjá Flensburg

Viggó Sigurðsson og lærisveinar hans í þýska liðinu Flensburg unnu í kvöld mikilvægan 35-28 sigur á króatísku meisturunum RK Zagreb á heimavelli sínum í kvöld í leik sem sýndur var beint á Eurosport 2 á Digital Ísland. Joachim Boldsen skoraði 8 mörk fyrir Flensburg og Lars Christiansen skoraði 7 mörk.

Öruggur sigur hjá Blackburn

Enska úrvalsdeildarliðið Blackburn vann í kvöld sannfærandi 2-0 sigur á Salzburg í Evrópukeppni félagsliða og tryggði sér sæti í riðlakeppninni með 4-2 sigri í einvíginu. Benni McCarthy og David Bentley skoruðu mörk Blackburn í leiknum og réðu heimamenn ferðinni frá upphafi til enda.

West Ham úr leik

Ítalska liðið Palermo var ekki í teljandi vandræðum með að slá enska liðið West Ham úr leik í forkeppni Evrópukeppni félagsliða í kvöld og vann síðari leik liðanna 3-0 á heimavelli sínum á Sikiley eftir að hafa sigrað 1-0 í fyrri leiknum á Englandi á dögunum.

Tottenham áfram

Tottenham komst í kvöld áfram í riðlana í Evrópukeppni félagsliða eftir tilþrifalítinn 1-0 sigur á tékkneska liðinu Slavia Prag og vann því samanlagt 2-0. Það var fyrirliðinn Robbie Keane sem skoraði sigurmarkið þegar skammt var eftir af leiknum, en bæði lið fengu reyndar dauðafæri á lokasprettinum.

Newcastle í riðlakeppnina

Newcastle vann nokkuð þægilegan 2-1 sigur á Levadia Tallin í forkeppni Evrópukeppni félagsliða í kvöld og er því komið í riðlakeppnina með samtals 3-1 sigri í einvíginu. Það var Obafemi Martins sem gerði út um leikinn með tveimur mörkum með skömmu millibili í upphafi síðari hálfleiks. Kristinn Jakobsson dæmdi leikinn ásamt þremur íslenskum aðstoðarmönnum og komst ágætlega frá verkefninu.

Viggó og félagar í beinni á Eurosport

Viggó Sigurðsson og lærisveinar hans í þýska handknattleiksliðinu Flensburg etja nú kappi við Króatíumeistara RK Zagreb í meistaradeildinni og er leikurinn sýndur beint á Eurosport 2 sem er að finna Fjölvarpi Digital Ísland.

Kominn með HM húðflúr

Varnarmaðurinn umdeildi Marco Materazzi hjá Inter Milan er búinn að fá sér enn eitt húðflúrið og er það minnisvarði um sigur Ítala á HM í sumar. Materazzi komst þar eins og allir vita í heimsfréttirnar með því að verða fyrir reiðum skalla Zinedine Zidane, en ítalski varnarmaðurinn skoraði líka mark Ítala í leiknum dramatíska.

Inter, eruð þið geðveikir?

Ítölsku blöðin vönduðu stjörnum prýddu liði Inter Milan ekki kveðjurnar á síðum sínum í dag eftir að liðið tapaði 2-0 fyrir Bayern Munchen á heimavelli í Meistaradeildinni. Þeim Zlatan Ibrahimovic og Fabio Grosso var báðum vikið af leikvelli í gærkvöldi og það nýtti þýska liðið sér vel, en Inter hefur ekki fengið eitt einasta stig úr fyrstu tveimur leikjum sínum í B-riðli.

Margrét Lára með fjögur mörk í stórsigri á Portúgal

Íslenska kvennalandsliðið lauk keppni með stæl í undankeppni HM 2007 í kvöld þegar liðið rótburstaði Portúgala 6-0 ytra, þar sem Margrét Lára Viðarsdóttir skoraði fjögur mörk fyrir íslenska liðið og Katrín Jónsdóttir tvö. Íslenska liðið hafnaði í þriðja sæti í riðli sínum á eftir Svíum og Tékkum en þegar var ljóst að liðið kæmist ekki á HM.

Mæta liði frá Litla-Hrauni í kvöld

Knattspyrnuliðið KF Nörd fær sitt erfiðasta verkefni til þessa í kvöld þegar liðið mætir knattspyrnuúrvali fanga á Litla-Hrauni í vikulegum raunveruleikaþætti á Sýn. Þátturinn hefst klukkan 21:15 og forvitnilegt verður að sjá hvernig Njörðunum vegnar gegn glæpamönnunum innan girðingar.

Ísland hefur yfir í hálfleik

Íslenska kvennalandsliðið í knattspyrnu hefur 2-0 forystu þegar flautað hefur verið til hálfleiks í viðureign sinni við Portúgala ytra í lokaleik sínum í riðlinum í undankeppni HM 2007. Katrín Jónsdóttir kom íslenska liðinu í 1-0 eftir aðeins 9 mínútur og Margrét Lára Viðarsdóttir skoraði annað markið eftir 22 mínútur.

Newcastle - Levadia Tallin í beinni

Sjónvarpsstöðin Sýn mun sýna beint frá leik Newcastle og eistneska liðsins Levadia frá Tallin klukkan 18:35 í kvöld, en leikurinn er ekki síst merkilegur fyrir þær sakir að þar verður íslenskur dómarakvartett að störfum.

Kraftaverkin gerast enn í Óðinsvéum

Einum leik er nú lokið í Evrópukeppni félagsliða í knattspyrnu, en þar gerði danska liðið Odense BK sér lítið fyrir og sló út þýska liðið Hertha frá Berlín með 1-0 sigri á heimavelli sínum. Fyrri leiknum í Þýskalandi lauk með 2-2 jafntefli og því er danska liðið komið áfram í riðlakeppnina.

Kona tekur við forsetaembætti hjá Bilbao

Spænska knattspyrnufélagið Athletic Club Bilbao hefur nú í fyrsta sinn ráðið konu sem forseta. Sú heitir Ana Urkijo og tekur hún við embættinu tímabundið eftir að Fernando Lamikiz sagði af sér. Urkijo er 51 árs gömul og gegndi áður embætti varaforseta félagsins, en hún tók formelga við starfinu eftir stjórnarfund í dag.

Bonzi Wells semur við Houston Rockets

Framherjinn Bonzi Wells sem lék með Sacramento Kings í NBA deildinni á síðustu leiktíð hefur gengið frá samningi við Houston Rockets. Wells var síðasta "stóra nafnið" á lista leikmanna sem voru með lausa samninga fyrir næsta tímabil, en samningur hans við Texas liðið er aðeins til tveggja ára og getur hann orðið laus allra mála eftir næsta tímabil.

Spearmon með þriðja besta tíma sögunnar í 200

Bandaríkjamaðurinn Wallace Spearmon náði í gærkvöldi þriðja besta tíma sem náðst hefur í sögunni í 200 metra hlaupi þegar hann kom í mark á 19,65 sekúndum á alþjóðlegu frjálsíþróttamóti í Daegu í Suður-Kóreu. Aðeins landar hans Xavier Carter á 19,63 og heimsmethafinn Michael Johnson á 19,32 hafa náð betri tíma í greininni.

ÍA vill halda Arnari og Bjarka

Stjórn meistaraflokks ÍA hefur farið þess á leit við þá Arnar og Bjarka Gunnlaugssyni að þeir verði áfram í röðum félagsins eftir að ljóst varð að Guðjón Þórðarson tæki við starfi þeirra sem þjálfari félagsins í Landsbankadeildinni. Þetta kemur fram á vefnum Skessuhorni í dag.

Allt vitlaust á Sikiley

Til átaka kom milli stuðningsmanna ítalska liðsins Palermo og enska liðsins West Ham á Sikiley í dag, en liðin mætast í Evrópukeppni félagsliða í kvöld. Tuttugu stuðningsmenn West Ham voru handteknir og sex aðrir fluttir á sjúkrahús eftir að til átakanna kom - þar sem stólum og flöskum var grýtt í allar áttir í miðbæ Palermo og kalla þurfti til óeirðalögreglu til að skakka leikinn.

Dein vill halda Wenger í 10 ár til viðbótar

Í dag eru liðin tíu ár síðan franski knattspyrnustjórinn Arsene Wenger tók við enska úrvalsdeildarliðinu Arsenal og hefur stjórnarformaður félagsins gefið það út í tilefni dagsins að Wenger sé æviráðinn hjá félaginu ef hann óskar þess og vonast til að halda honum í að minnsta kosti áratug í viðbót.

Eto´o verður frá í allt að þrjá mánuði

Illur grunur lækna Evrópumeistara Barcelona frá í gærkvöldi hefur nú verið staðfestur eftir að framherjinn Samuel Eto´o fór í myndatöku í dag og í ljós kom að hann verður frá í allt að þrjá mánuði vegna hnémeiðsla. Eto´o meiddist í leik Werder Bremen og Barcelona í gær, en meiðsli hans gætu þó þýtt að tækifærum Eiðs Smára Guðjohnsen hjá Katalóníuliðinu ætti eftir að fjölga til muna.

Ásgeir Elíasson að taka við ÍR

Ásgeir Elíasson verður að öllu óbreyttu tilkynntur sem næsti þjálfari 2. deildarliðs ÍR á morgun. Heimildir NFS herma að stutt sé í að samningar náist milli Ásgeirs og Breiðhyltinga, en Ásgeir var látinn fara frá Fram á dögunum og við starfi hans þar tók Ólafur Þórðarson.

Guðjón Þórðarson tekur við liði ÍA

Guðjón Þórðarson hefur skrifað undir þriggja ára samning við knattspyrnudeild ÍA um að taka við þjálfun liðsins í Landsbankadeildinni. Það hefur lengi legið í loftinu að Guðjón sneri aftur á fornar slóðir, en Fréttablaðið birti fyrst fréttir þessa efnis í fyrir um tveimur vikum.

Naismith frá keppni í sex vikur

Skoski landsliðsmaðurinn Gary Naysmith hjá enska úrvalsdeildarliðinu Everton verður frá keppni í að minnsta kosti sex vikur eftir að hafa tognað á hné í leik gegn Newcastle um síðustu helgi. Þetta þýðir að Naysmith mun missa af landsleikjum Skota gegn Frökkum og Úkraínumönnum í næsta mánuði og snýr væntanlega ekki aftur í lið Everton fyrr en undir lok nóvember að mati lækna félagsins.

Hughes ætlar Blackburn í riðlakeppnina

Mark Hughes, stjóri Blackburn, segir ekkert annað koma til greina en að koma liði sínu í riðlakeppni Evrópukeppni félagsliða en Blackburn mætir Salzburg á heimavelli í síðari viðureign liðanna í forkeppninni annað kvöld. Fyrri leikurinn fór 2-2 þar sem enska liðið fékk á sig jöfnunarmark í blálokin.

Góð endurkoma hjá Venus Williams

Bandaríska tenniskonan Venus Williams átti vel heppnaða endurkomu á tennisvellinum í dag þegar hún sigraði Önu Ivanovic 6-3 og 6-4 á Fortis meistaramótinu. Williams var þarna að spila sinn fyrsta leik í þrjá mánuði og hafði ekki spilað síðan hún lauk keppni vegna meiðsla á Wimbledon mótinu. Hún er nú aðeins í 54. sæti heimslistans í tennis.

Eto´o verður frá í 2-3 mánuði

Evrópumeistarar Barcelona hafa orðið fyrir miklu áfalli en skæðasti framherji liðsins, Kamerúninn Samuel Eto´o, meiddist á hné í leiknum gegn Werder Bremen í Meistaradeildinni í kvöld og segist læknir liðsins halda að hann verði frá keppni í tvo til þrjá mánuði fyrir vikið.

Óvæntur sigur ÍR á Haukum

Lið ÍR gerði sér lítið fyrir og skellti Haukum örugglega 36-30 í síðari leik kvöldsins í DHL deild karla í handbolta. Það var mál manna fyrir mót að ÍR yrði í miklum vandræðum í vetur eftir að hafa enn eina ferðina misst mikið af mönnum úr hóp sínum, en þessi fyrsti leikur liðsins í deildinni virðist þó ekki bera þess merki.

Mark Crouch var stórkostlegt

Rafa Benitez var ánægður með leik sinna manna í Liverpool í 3-2 sigrinum á Galatasaray í kvöld, þrátt fyrir að gestirnir frá Tyrklandi hafi gert sig líklega til að jafna leikinn eftir að hafa lent undir 3-0. Benitez sá ástæðu til að hrósa hinum leggjalanga Peter Crouch fyrir tilburði sína á vellinum, enda skoraði sá eftirminnilegt mark með hjólhestaspyrnu fyrir framan Kop stúkuna frægu.

Drogba er funheitur

Jose Mourinho var skiljanlega í skýjunum yfir framherja sínum Didier Drogba eftir leikinn við Levski Sofia í Meistaradeildinni í kvöld, en Fílstrendingurinn sterki skoraði þrennu í 3-1 sigri Chelsea í Búlgaríu.

Framarar komu fram hefndum

Íslandsmeistarar Fram sóttu Stjörnuna heim í fyrsta leik DHL deildar karla í handknattleik í kvöld og höfðu Íslandsmeistararnir sigur 30-26 og komu því fram hefndum frá tapinu í meistarakeppni HSÍ á dögunum. Þess má geta að Fram tekur á móti lærisveinum Alfreðs Gíslasonar í Gummersbach í meistaradeildinni um helgina og verður sá leikur sýndur beint á Sýn.

Liverpool slapp með skrekkinn

Liverpool vann í kvöld nauman 3-2 sigur á tyrkneska liðinu Galatasaray í Meistaradeild Evrópu í leik sem sýndur var beint á Sýn. Peter Crouch skoraði tvö mörk og Luis Garcia eitt og komu enska liðinu í 3-0, en Tyrkirnir höfðu alls ekki sagt sitt síðasta og skoruðu tvö mörk á sex mínútum um miðjan síðari hálfleikinn. Lengra komust þeir þó ekki og enska liðið slapp með skrekkinn.

Eiður kemur inn fyrir meiddan Eto´o

Það blæs ekki byrlega fyrir Evrópumeistara Barcelona það sem af er kvöldi, því liðið er ekki aðeins 1-0 undir gegn Werder Bremen á útivelli í Meistaradeildinni, heldur var framherjinn skæði Samuel Eto´o borinn meiddur af leikvelli strax í upphafi síðari hálfleiks. Hann virðist vera nokkuð alvarlega meiddur á hné, en eins dauði er annars brauð og Eiður Smári Guðjohnsen er því kominn inn í lið Barcelona í stað Eto´o á 55 mínútu.

Bandaríska liðið spilaði ömurlega

Bandaríski kylfingurinn Jim Furyk hefur vísað þeim kenningum á bug að lið Bandaríkjanna hafi tapað í Ryder-bikarnum vegna þess að það skorti hungur. Furyk segir liðið einfaldlega hafa tapað fyrir því evrópska af því það hafi spilað ömurlegt golf alla keppnina.

Liverpool í góðum málum

Nú er kominn hálfleikur í leikjum kvöldsins í Meistaradeild Evrópu. Peter Crouch (9.) og Luis Garcia (14.) skoruðu mörk Liverpool sem hefur 2-0 yfir gegn Galatasaray á heimavelli sínum í sjónvarpsleiknum á Sýn. Heimamenn hafa ráðið ferðinni lengst af og útlit fyrir að eftirleikurinn verði þeim auðveldur.

Heimsmeistarinn handleggsbrotinn

Vonir heimsmeistarans Sebastien Loeb um að vinna sinn þriðja titil í röð í rallakstri hafa nú minnkað til muna eftir að kappinn datt af baki fjallahjóli sínu í Sviss með þeim afleiðingum að hann handleggsbrotnaði. Loeb hefur reyndar 35 stiga forskot í stigakeppni ökumanna, en ljóst þykir að hann muni missa af Tyrklandsrallinu sem fram fer um miðjan næsta mánuð.

Eiður Smári á varamannabekk Barcelona

Nú er búið að tilkynna byrjunarlið Barcelona sem sækir þýska liðið Werder Bremen heim í Meistaradeildinni en leikurinn er sýndur beint á Sýn Extra nú klukkan 18:45. Eiður Smári er á varamannabekk Barcelona í kvöld sem áður.

Leikir kvöldsins á rásum Sýnar

Sjónvarpsstöðin Sýn verður að venju með þrjá leiki í boði í beinni útsendingu úr Meistaradeild Evrópu á rásum sínum. Aðalleikur kvöldsins verður viðureign Liverpool og Galatasaray á Sýn, en þar kemur ekkert annað en sigur til greina hjá fyrrum Evrópumeisturunum eftir að gengi liðsins hefur ekki verið upp á marga fiska í Evrópukeppninni undanfarið.

Schaaf ætlar að koma Barcelona á óvart

Lið Werder Bremen hefur ekki unnið sigur í fimm síðustu leikjum sínum í Meistaradeild Evrópu en Thomas Schaaf þjálfari ætlar sér að koma Evrópumeisturum Barcelona á óvart í kvöld þegar liðin mætast í A-riðli á Westerstadion í Bremen. Leikurinn verður sýndur beint á Sýn Extra og hefst útsending klukkan 18:30.