Fabregas vill vera áfram hjá Arsenal

Umboðsmaður spænska miðjumannsins Cesc Fabregas hjá Arsenal segir að Real Madrid hafi gert eitt gott tilboð í leikmanninn unga, en segir hann hafa gert upp hug sinn - hann ætli að vera áfram í herbúðum Arsenal. Þá hefur Arsenal gefið það út að táningurinn Theo Walcott verði ekki lánaður frá félaginu á næstu misserum til að fá reynslu af að spila með aðalliði.

Meite til Bolton

Abdoulaye Meite, landsliðsmaður Fílabeinsstrandarinnar, hefur samþykkt að ganga í raðir Bolton og mun skrifa undir fjögurra ára samning fljótlega eftir að gengið hefur verið frá lausum endum og læknisskoðun. Meite er 25 ára gamall varnarmaður og hefur lengi verið undir smásjánni hjá Sam Allardyce, stjóra Bolton.

Nálægt samningi við Kuszczak

Enska úrvaldeildarfélagið Manchester United hefur staðfest að það sé nálægt því að ganga frá kaupum á pólska varamarkverðinum Tomasz Kuszczak frá West Brom. Kuszczak er 26 ára gamall og fór til West Brom á frjálsri sölu frá Hertha Berlín á sínum tíma.

Íslenska liðið spilar í Magdeburg

Búið er að tilkynna hvar riðlarnir á HM í Þýskalandi á næsta ári verða spilaðir og í ljós kom að íslenska landsliðið mun spila fyrstu þrjá leiki sína í Magdeburg. Það verður að teljast íslenska liðinu til tekna, því eins og flestir vita eru nokkrir af landsliðsmönnunum öllum hnútum kunnugir þar á bæ. Alfreð Gíslason stýrði liði Magdeburg við frábæran orðstír í mörg ár og þá hafa leikmenn eins og Ólafur Stefánsson, Sigfús Sigurðsson og Arnór Atlason gert fína hluti með liðinu.

Sáttur við mótherjana

Alfreð Gíslason, landsliðsþjálfari í handknattleik, segist mjög ánægður með mótherja íslenska liðsins í B-riðlinum á HM í handbolta sem hefst í Þýskalandi í janúar næstkomandi. Í samtali við NFS sagði Alfreð að Evrópumeistarar Frakka væru ekkert verri mótherji en hinar þjóðirnar í efsta styrkleikaflokki á mótinu, en benti á að þó vissulega væri lið Úkraínu sýnd veiði en ekki gefin, væri íslenska liðið heldur ekki skipað neinum aukvisum.

Paul Pierce framlengir við Boston

Hið fornfræga NBA lið Boston Celtics hefur náð samkomulagi við stórstjörnuna Paul Pierce um að framlengja samning sinn við félagið til þriggja ára. Talið er að samningur þessi sem gildir út árið 2008 muni tryggja Pierce tæpar 60 milljónir dollara á samningstímanum, en deildin á þó enn eftir að samþykkja þessa ráðstöfun.

Fortune nálægt samningi við Bolton

Suður-Afríski miðjumaðurinn Quinton Fortune er nú sagður nálægt því að landa samningi við úrvalsdeildarlið Bolton, en hann hefur verið í æfingabúðum með liðinu undanfarið. Fortune er samningslaus eftir að hann var látinn fara frá Manchester United í vor, en Sam Allardyce, stjóri Bolton, segir ekkert því til fyrirstöðu að Fortune fái samning ef hann nær að halda heilsu, en það voru helst þrálát meiðsli hans sem urðu þess valdandi að hann var látinn fara frá Manchester United.

Orðrómurinn æ háværari

Sá orðrómur gerist nú æ háværari að hollenski framherjinn Ruud Van Nistelrooy hjá Manchester United sé á leið til spænska liðsins Real Madrid. Hollenskir fjölmiðlar halda því fram að Nistelrooy hafi þegar samþykkt félagaskiptin og að aðeins eigi eftir að semja um kaupverðið. Sir Alex Ferguson heldur blaðamannafund á morgun og þar er talið líklegt að svör fáist um framtíð Hollendingsins.

Úrskurðar að vænta seinna í dag

Nú styttist í að dómur falli í stóra spillingarmálinu sem riðið hefur yfir ítalska knattspyrnu á síðustu vikum og seinnipartinn í dag kemur í ljóst hvort stórliðin Juventus, AC Milan, Lazio og Fiorentina verða dæmd niður um deild í refsingarskyni.

Ísland í riðli með Frökkum, Úkraínu og Ástralíu

Nú rétt áðan var dregið í riðla fyrir HM í handknattleik sem fram fer í Þýskalandi snemma næsta árs. Íslendingar munu leika í B-riðli mótsins ásamt Frökkum, Úkraínumönnum og Áströlum og ljóst að íslenska liðið getur verið nokkuð sátt við mótherja sína.

Horacio Elizondo hættur að dæma

Argentínski dómarinn Horacio Elizondo hefur tilkynnt að hann ætli sér að hætta dómgæslu og engin hætta er á því að lokaleikur hans renni mönnum úr minni, því Elizondo var maðurinn sem rak Zinedine Zidane af velli í úrslitaleiknum á HM um síðustu helgi. Elizondo segist hafa tekið hárrétta ákvörðun.

Keflvíkingar burstuðu ÍBV

Keflvíkingar tóku Eyjamenn í bakaríið í leik kvöldsins í Landsbankadeild karla í knattspyrnu og sigruðu 6-2. Stefán Örn Arnarsson og Þórarinn Kristjánsson skoruðu sitt hvor tvö mörkin fyrir Keflavík og Kenneth Gustavsson og Guðmundur Steinarsson skoruðu eitt hvor. Pétur Runólfsson og Ulrik Drost skoruðu mörk ÍBV, en Páli Hjarðar var vikið af leikvelli fyrir olnbogaskot á 70. mínútu og léku Keflvíkingar því manni fleiri síðasta korterið í leiknum.

Valur lá í Danmörku

Valsmenn töpuðu í kvöld fyrri leik sínum gegn danska liðinu Bröndby í forkeppni Evrópukeppni félagsliða 3-1. Danska liðið hafði yfir 3-0 í hálfleik, en Garðar Gunnlaugsson náði að rétta hlut íslenska liðsins undir lokin.

Keflvíkingar yfir í hálfleik

Einn leikur fer fram í Landsbankadeild karla í knattspyrnu í kvöld. Keflvíkingar hafa yfir 2-1 gegn ÍBV á heimavelli sínum þegar flautað hefur verið til leikhlés. Pétur Runólfsson kom ÍBV yfir á 13. mínútu, en þeir Kenneth Gustavsson og Stefán Örn Arnarsson skoruðu fyrir heimamenn.

Útlitið dökkt hjá Val

Það stefnir í langt kvöld hjá Valsmönnum sem etja nú kappi við danska liðið Bröndby í forkeppni Evrópukeppni félagsliða. Staðan í hálfleik er 3-0 fyrir heimamenn, sem komust yfir strax eftir 8 mínútur og bættu svo við tveimur mörkum á tveggja mínútna kafla eftir hálftíma leik. Þetta er fyrri viðureign liðanna og fer fram í Danmörku.

Tap hjá ÍA í Danmörku

Skagamenn töpuðu í kvöld fyrri leik sínum gegn danska liðinu FC Randers í forkeppni Evrópukeppni félagsliða á útivelli 1-0. Heimamenn í Randers voru ívið sterkari í leiknum, en sá síðari fer fram á Skipaskaga þann 27. júlí næstkomandi.

Roberto Donadoni tekur við af Lippi

Ítalska knattspyrnusambandið gekk í dag frá ráðningu Roberto Donadoni í stöðu landsliðsþjálfara Ítala í stað Marcello Lippi sem sagði af sér á dögunum. Donadoni hefur ekki mikla reynslu af þjálfun, en var síðast með lið Livorno á Ítalíu og stýrði liðinu í sjötta sæti í deildinni. Hann er aðeins 43 ára gamall og stýrði áður Lecce og Genoa. Donadoni gerði garðinn frægan með liði AC Milan sem leikmaður og var í landsliðinu sem hlaut bronsið á HM árið 1990.

Jafnt í hálfleik hjá Skagamönnum

Nú er kominn hálfleikur í viðureign Skagamanna og danska liðsins FC Randers í forkeppni Evrópukeppni félagsliða í knattspyrnu. Staðan er enn 0-0. Heimamenn voru hættulegri framan af leik, en Skagaliðið komst betur inn í leikinn þegar á leið.

Mike James til Minnesota

Leikstjórnandinn Mike James skrifaði í gærkvöld undir samning við lið Minnesota Timberwolves í NBA deildinni, en James var með lausa samninga hjá Kanadaliði Toronto Raptors. James þótti minni spámaður í deildinni allt þar til í fyrravetur, þegar hann sprakk út með Toronto og skoraði yfir 20 stig að meðaltali í leik og var á meðal efstu manna í deildinni í 3ja stiga skotnýtingu.

Ætlum ekki inn í hringinn til að dansa

Hnefaleikarinn Shane Mosley lofar að setja á svið flugeldasýningu fyrir áhorfendur á laugardagskvöldið þegar hann mætir Fernando Vargas í Las Vegas í bardaga sem sýndur verður á sjónvarpsstöðinni Sýn. Þeir félagar mættust áður í febrúar og þar var Mosley dæmdur sigur eftir að Vargas hlaut skurð í andliti, sem hann sagðist hafa fengið eftir að Mosley skallaði sig.

Suðurlandströllið 2006 um helgina

Á laugardag fer fram hin árlega aflraunakeppni Suðurlandströllið. Keppnin hefst á Selfossi klukkan 13:30 þar sem meðal annars verður keppt í trukkadrætti og drumbalyftu. Klukkan 15:30 verður keppt í axlalyftu við Hótel Örk og keppninni lýkur við Eden í Hveragerði þar sem keppendur burðast með Húsafellshelluna. Á meðal keppenda verða Kristinn Óskar Haraldsson "Boris" sem nýlega tryggði sér þáttökurétt í keppninni um sterkasta mann heims og Auðunn "Verndari" Jónsson.

Landsleik Íslendinga og Spánverja flýtt?

Spænsk vefsíða helguð knattspyrnuliði Barcelona greinir frá því í dag að Frank Rijkaard geti teflt fram sínu sterkasta liði í hinum árlega leik um meistara meistaranna á Spáni, því spænska knattspyrnusambandið sé búið að semja við það íslenska að flýta fyrirhuguðum landsleik þjóðanna hér á landi þann 16. ágúst.

Kirk Hinrich í hópinn í stað Redick

Leikstjórnandinn Kirk Hinrich hefur verið valinn í bandaríska landsliðshópinn í körfubolta í stað stórskyttunnar JJ Redick sem er meiddur og þurfti að hætta við að fara í æfingabúðir með liðinu. Bandaríkjamenn eru nú á fullu að undirbúa lið sitt fyrir heimsmeistaramótið sem fram fer í Japan í næsta mánuði, þar sem liðið leikur í riðli með Ítölum, Porto Rikó, Slóvenum, Kínverjum og Senegölum.

Sam Cassell framlengir við Clippers

Leikstjórnandinn Sam Cassell hefur framlengt samning sinn við Los Angeles Clippers um tvö ár, en ekki hefur verið gefið upp hvað hann fær í aðra hönd fyrir samninginn. Þó Cassell sé fyrir nokkru kominn af léttasta skeiði sem leikmaður, skoraði hann rúm 17 stig og gaf 6 stoðsendingar að meðaltali í leik fyrir Clippers á síðasta vetri. Það sem meira er tók hann að sér leiðtogahlutverk í liðinu og leiddi það til besta árangurs síns í yfir þrjá áratugi.

Wade framlengir við Miami

Verðmætasti leikmaður NBA-úrslitanna í vor, Dwyane Wade hjá Miami, hefur framlengt samning sinn við félagið um þrjú ár líkt og LeBron James hjá Cleveland gerði á dögunum. Flestir bjuggust við að Wade skrifaði undir fimm ára samning, en líta má á samningur þessi sé langtímafjárfesting fyrir leikmanninn.

Ruud Van Nistelrooy á leið til Real Madrid

Spænska dagblaðið Marca heldur því fram í dag að aðeins eigi eftir að ganga frá smáatriðum svo hollenski framherjinn Ruud Van Nistelrooy geti gengið í raðir Real Madrid frá Manchester United fyrir upphæð nálægt 11 milljónum punda. Engar fréttir hafa borist frá Englandi til að staðfesta þetta en lið Real Madrid er með hverjum deginum orðað við fleiri leikmenn í ensku úrvalsdeildinni.

Valencia hefur mikinn áhuga á Del Horno

Spænska stórliðið Valencia hefur gefið það út að það hafi mikinn hug á því að fá vinstri bakvörðinn Asier del Horno til liðs við sig frá Chelsea. Del Horno er 25 ára gamall spænskur landsliðsmaður og spilaði 25 deildarleiki fyrir ensku meistarana á síðustu leiktíð.

Rannsókn hafin vegna ásakana Zidane

Alþjóða knattspyrnusambandið, FIFA, hefur ákveðið að hefja rannsókn á hegðun ítalska varnarmannsins Marco Materazzi í úrslitaleiknum á HM í kjölfar þeirra þungu saka sem Zinedine Zidane bar hann í viðtali við franska sjónvarpið í gær. Zidane hefur verið gert að leggja fram skrifleg gögn í málinu og fær Materazzi tækifæri til að svara fyrir sig í kjölfarið.

Enska knattspyrnusambandið er á villigötum

Tony Woodcock, fyrrum landsliðsmaður Englands í knattspyrnu, segir að menn verði að leita lengra en til Sven-Göran Eriksson til að finna svör við döpru gengi og spilamennsku enska landsliðsins á HM.

Middlesbrough hætt við að kaupa Robert Huth

Enska úrvalsdeildarfélagið Middlesbrough tilkynnti í dag að það væri hætt við að kaupa þýska landsliðsmiðvörðinn Robert Huth frá Chelsea. Búið var að samþykkja félagaskipti hans fyrir fimm milljónir punda, en talið er víst að Boro hafi hætt við að kaupa hann eftir að ökklameiðsli hans urðu þess valdandi að hann stóðst ekki læknisskoðun.

Ekkert tilboð frá Arsenal

Umboðsmaður franska landsliðsmannsins Franck Ribery hefur vísað því á bug að Arsenal hafi gert 10 milljón punda tilboð í vængmanninn knáa, sem gerði fína hluti með Frökkum á HM þrátt fyrir að vera nýgræðingur með landsliðinu.

Vill að Zidane haldi gullknettinum

Varnarmaðurinn Marco Materazzi vill að Zinedine Zidane haldi gullknettinum, verðlaununum sem hann fékk fyrir að vera kjörinn besti leikmaðurinn á HM. Borist hefur í tal að verðlaunin verði tekin af Zidane eftir að hann gerðist sekur um líkamsárás í úrslitaleiknum, en það hefur ekki áhrif á skoðun fórnarlambs árásarinnar, hinn ítalska Materazzi.

Get ekki beðið Materazzi afsökunar

Franski leikmaðurinn Zinedine Zidane tjáði sig í fyrsta sinn opinberlega um atburðina í úrslitaleiknum á HM á dögunum, í viðtali við franska sjónvarpið. Zidane biðst afsökunar á framferði sínu þegar hann skallaði hinn ítalska Marco Materazzi og segir hann hafa sagt mjög ljóta persónulega hluti um systur sína og móður. Hann fékkst ekki til að greina frekar frá því hvað fór þeirra á milli.

Neitar ásökunum Zidane

Ítalski varnarmaðurinn Marco Materazzi neitar því að hafa sagt ljóta hluti um móður Zinedine Zidane í úrslitaleiknum á HM eins og Zidane hélt fram í franska sjónvarpinu nú undir kvöld. Materazzi segist sjálfur hafa misst móður sína ungur og segir að Zidane sé ein af hetjum sínum á knattspyrnuvellinum.

Inter kaupir þrjá leikmenn

Stórlið Inter Milan á Ítalíu hefur fest kaup á þremur nýjum leikmönnum. Sá þekktasti er líklega franski miðjumaðurinn Oliver Dacourt sem leikið hefur með Roma undanfarin ár og var fastamaður í franska landsliðinu í mörg ár. Þá hefur liðið fengið til sín Brasilíumennina Maicon Douglas Sisenando frá Mónakó og Maxwell Scherrer Cabelino Andrade frá Empoli, en þeir eru báðir 24 ára gamlir.

Eriksson vildi fá Ferdinand í landsliðið

Sven-Göran Eriksson, fráfarandi landsliðsþjálfari Englendinga, hefur gefið það upp að hann hafi viljað fá varnarmanninn Anton Ferdinand inn í hóp sinn á HM í stað Luke Young þegar hann meiddist. Ekkert varð þó af þessu, því þegar Eriksson hafði samband við Ferdinand, hafði hann 24 tímum áður gengist undir aðgerð vegna kviðslits.

LeBron James skrifar undir styttri samning

Stórstjarnan LeBron James undirritar í kvöld nýjan samning við Cleveland Cavaliers í NBA-deildinni, en samningur hans verður þó nokkuð frábrugðinn þeim samningi sem félagar hans Carmelo Anthony og Dwyane Wade úr nýliðaárgangnum 2003 skrifuðu undir á dögunum.

Arsenal líklegast

Umboðsmaður argentínska framherjans Javier Saviola hjá Barcelona segir að allt bendi til þess að hann gangi í raðir Arsenal í sumar. Saviola var í eldlínunni með argentínska landsliðinu á HM og var lykilmaður í liði Sevilla sem vann sigur í Evrópukeppni félagsliða í vor, en þar var hann sem lánsmaður.

Sol Campbell á nóg inni

Harry Redknapp heldur áfram að gera hosur sínar grænar fyrir miðverðinum Sol Campbell, sem á dögunum tilkynnti að hann væri hættur að spila með Arsenal og ætlaði að reyna fyrir sér erlendis. Campbell var gagnrýndur nokkuð undir lok síðustu leiktíðar og voru margir á því að bestu dagar hans sem leikmanns væru að baki.

Keppnisbanni aflétt á Grikki

Alþjóða knattspyrnusambandið aflétti í dag keppnisbanninu sem það setti á Grikki í kjölfar upplausnar í rekstri knattspyrnusambandsins þar í landi. Nú hefur tekist að ganga frá lausum endum sem uppfylla kröfur FIFA og því geta Grikkir mætt Englendingum í vináttuleik í næsta mánuði eins og til stóð.

Fabregas fer ekki fet

Arsene Wenger segir að spænski miðjumaðurinn Cesc Fabregas sé alls ekki á leið til Real Madrid eins og fjölmiðlar á Spáni og ný stjórn Real hefur haldið fram undanfarna daga.

Farinn sem lánsmaður til Marseille

Franski framherjinn Djibril Cisse er farinn til liðs Marseille í heimalandi sínu sem lánsmaður frá enska úrvalsdeildarfélaginu Liverpool, þetta staðfesti franska liðið í dag. Cisse er fótbrotinn og getur ekkert leikið á næstunni, en hann ræður sér ekki yfir fögnuði yfir að vera loks kominn til Frakklands á ný. Samningurinn býður upp á að franska liðið kaupi Cisse að lánstímanum loknum.

Ísland hrapar niður listann

Íslenska karlalandsliðið í knattspyrnu er komið í 107. sæti styrkleikalista FIFA, en nýr listi var birtur í morgun. Íslenska liðið hefur aldrei áður verið svo neðarlega á listanum en nokkrar þjóðir lyfta sér verulega mikið í þetta sinn í kjölfar góðs árangurs á HM.

Hamann genginn í raðir Mancester City

Þýski miðjumaðurinn Dietmar Hamann, sem verið hefur í röðum Liverpool síðustu ár, hefur gengið til liðs við Manchester City. Hamann var á dögunum kominn á fremsta hlunn með að fara til Bolton, en snerist hugur á síðustu stundu og fór til City í einhverjum snörustu félagaskiptum sem um getur í ensku úrvalsdeildinni.

Marcello Lippi hættur

Marcello Lippi tilkynnti í dag að hann hefði ákveðið að hætta að þjálfa ítalska landsliðið í knattspyrnu eftir rúm tvö ár í starfi. Lippi segist hætta sáttur eftir að hafa náð að uppfylla draum sinn sem þjálfari, en hefur ekkert gefið upp um framtíðaráform sín enn sem komið er.