AC Milan lagði Parma í markaleik

AC Milan vann nauman sigur á Parma í kvöldleiknum á Ítalíu í kvöld, en Milanomenn máttu þakka fyrir að fara með sigur af hólmi 4-3, eftir að hafa náð 3-1 forystu í leiknum. Gilardino, Kaka og Shevchenko skoruðu mörk Milan í leiknum og eitt markið var sjálfsmark, en Marchionni skoraði tvö mörk fyrir Parma og Cannavaro eitt.

Markalaust hjá Villareal og Real Madrid

Villareal og Real Madrid gerðu markalaust jafntefli í spænska boltanum í kvöld. Villareal situr í fimmta sæti deildarinnar með 31 stig, en Real er í því sjötta með einu stigi minna. Leikurinn var sýndur á sjónvarpsstöðinni Sýn.

Jafnteflið ekki áfall

Sir Alex Ferguson, knattspyrnustjóri Manchester United, segir að jafnteflið gegn utandeildarliðinu Burton í enska bikarnum í dag sé ekki áfall, þó vissulega hafi hans menn búist við sigri.

Jóhannes lagði upp sigurmark Leiceister

Leicester City vann sætan sigur á Tottenham Hotspur í lokaleik dagsins í enska deildarbikarnum, 3-2. Það var enginn annar en Jóhannes Karl Guðjónsson sem lagði upp sigurmark Leicester í lokin með glæsilegri sendingu inn fyrir vörn úrvalsdeildarliðsins. Tottenham komst í 2-0 í leiknum en er nú fallið út leik í enska bikarnum líkt og í deildarbikarnum, gegn minni spámönnum.

Tottenham leiðir gegn Leiceister

Tottenham hefur yfir 2-1 á útvelli gegn Leicester í lokaleik dagsins í enska bikarnum. Jermaine Jenas og Paul Stalteri skoruðu mörk Tottenham, en Elvis Hammond minnkaði muninn fyrir Leicester undir lok fyrri hálfleiksins og því getur allt gerst í þeim síðari. Jóhannes Karl Guðjónsson er í liði Leicester í leiknum.

Fimmtándi sigur Barcelona í röð

Fátt virðist geta komið í veg fyrir að Barcelona verji titil sinn í spænsku úrvalsdeildinni í knattspyrnu, því í gær vann liðið fimmtánda sigur sinn í röð í öllum keppnum þegar það lagði erkifjendur sína í Espanyol 2-1. Það voru Samuel Eto´o og Deco sem skoruðu mörk Katalóníuliðsins.

Aftur stórtap hjá Haukastúlkum

Kvennalið Hauka tapaði stórt í annað sinn á tveimur dögum fyrir króatíska liðinu Podravka Vegeta í EHF keppninni í handbolta, lokatölur í dag 39-23 fyrir Podravka. Ragnhildur Guðmundsdóttir skoraði sjö mörk fyrir Hauka og Ramune Pekarskyte skoraði fimm mörk.

Juventus heldur sínu striki

Juventus hefur tíu stiga forskot á toppi ítölsku A-deildarinnar í knattspyrnu eftir leiki dagsins. Juve sigraði Palermo 2-1 í gær, þar sem Adrian Mutu gerði bæði mörk liðsins, en Inter náði aðeins jafntefli gegn Siena í dag og er því tíu stigum á eftir meisturunum. AC Milan er í þriðja sæti deildarinnar og getur komist upp fyrir granna sína með sigri á Parma á San Siro í kvöld.

Ákvörðun Henry mikilvæg

Arsene Wenger, stjóri Arsenal, segir að ákvörðun Thierry Henry að vera áfram í röðum félagsins geti reynst sannkallaður vendipunktur fyrir liðið í framtíðinni. "Við erum með unga og efnilega leikmenn sem gæti sprungið út hvenær sem er, en það er mikilvægt að umkringja þá leikmönnum með getu og reynslu. Það er nokkuð sem Henry gefur okkur," sagði Wenger, sem hefur fulla trú á ungu liði sínu.

Burton hélt jöfnu gegn Manchester United

Utandeildarlið Burton náði í dag markalausu jafntefli við Manchester United á heimavelli sínum í enska bikarnum. Manchester United var ekki með sitt allra sterkasta lið í dag, en utandeildarliðið veitti þeim engu að síður harða keppni og fær nú að spreyta sig á Old Trafford í síðari leik liðanna.

Auðveldur sigur Sunderland

Botnlið úrvalsdeildarinnar, Sunderland, var ekki í teljandi vandræðum með utandeildarliðið Northwich í dag. Sunderland vann leik liðanna 3-0 og er því komið í fjórðu umferð bikarkeppninnar. Það voru þeir Collins, Whitehead og Le Tallec sem skoruðu mörk Sunderland í dag.

Duncan gefur ekki kost á sér í landsliðið

Framherjinn Tim Duncan hjá San Antonio Spurs hefur ákveðið að gefa ekki kost á sér í bandaríska landsliðið í körfubolta sem fer á HM í sumar og Ólympíuleikana í Peking árið 2008. Shaquille O´Neal, leikmaður Miami Heat, er enn að hugsa málið, en Allen Iverson hjá Philadelphia hefur þegar gefið út að hann hafi áhuga á að vera í liðinu ef það standi til boða.

United í vandræðum með Burton

Manchester United er í bullandi vandræðum með utandeildarlið Burton Albion í enska bikarnum, en nú er kominn háfleikur í viðureign liðanna sem er í beinni útsendingu á Sýn. Markalaust er í hálfleik og hefur utandeildarliðið átt nokkur ágæt færi í leiknum. Ole Gunnar Solkskjær er í byrnunarliði Manchester United í fyrsta skipti í hátt í tvö ár.

Fulham úr leik

Úrvalsdeildarlið Fulham féll úr keppni í enska bikarnum í dag þegar liðið lá á heimavelli fyrir neðrideildarliði Leyton Orient 2-1. Fulham fékk tækifæri til að jafna leikinn úr vítaspyrnu í síðari hálfleik, en markvörður Orient var hetja liðsins og varði spyrnuna og tryggði sínum mönnum ótrúlegan sigur. Heiðar Helguson var ekki í liði Fulham í dag.

Frumraun Keane breyttist í martröð

Roy Keane vill eflaust gleyma fyrsta leik sínum með Glasgow Celtic sem fyrst, því liðið beið lægri hlut fyrir 1. deildarliði Clyde í bikarkeppninni í dag 2-1. Keane hafði hægt um sig í leiknum, en tvö mörk voru dæmd af Clyde í leiknum og þóttu það umdeildir dómar.

Bryant skoraði 50 stig

Kobe Bryant er heldur betur í stuði þessa dagana og í nótt skoraði hann 50 stig fyrir LA Lakers í sigri liðsins á grönnum sínum í LA Clippers 112-109. Bryant hefur því skorað að meðaltali 49 stig í síðustu tveimur leikjum liðsins og í nótt hirti hann auk þess 8 fráköst og gaf 8 stoðsendingar.

Skrautlegur sigur Liverpool

Liverpool bar sigurorð af Luton Town 5-3 í lokaleik dagsins í FA bikarnum á Englandi, en leikurinn var bráðfjörugur og var sýndur í beinni útsendingu á Sýn. Heimamenn í Luton Town komust í 3-1 í leiknum, en Liverpool sýndi klærnar í síðari hálfleik og tryggði sér sigurinn.

Stjarnan lagði Víking

Þrír leikir fóru fram í DHL-deild kvenna í handbolta nú síðdegis. Stjarnan sigraði Víking 24-18 á heimavelli sínum í Ásgarði. Rakel Dögg Bragadóttir var markahæst í liði Stjörnunnar með 6 mörk, en Natasha Damiljanovic skoraði 5 fyrir Víking.

Luton yfir gegn Liverpool í hálfleik

Luton Town er heldur betur að koma á óvart gegn Liverpool í lokaleik dagsins í enska bikarnum. Luton hefur yfir 2-1 í hálfleik, eftir að Steven Gerrard hafði komið Evrópumeisturunum yfir senmma leiks. Leikurinn er í beinni útsendingu á Sýn.

Stórtap hjá Haukastúlkum

Kvennalið Hauka tapaði í dag 37-24 fyrir króatíska liðinu Podravka í EHF-keppninni í handbolta á heimavelli sínum að Ásvöllum, en síðari leikur liðanna fer fram á sama stað. Ramune Pekarskyte skoraði 11 mörk fyrir Haukana, sem komust í 3-0 í leiknum en sáu aldrei til sólar eftir það. Sérstaklega var markvörður Podravka þeim erfiður ljár í þúfu, en hún varði 27 skot í leiknum.

Úrvalsdeildarliðin í vandræðum en sluppu við áföll

Nokkur úrvalsdeildarlið lentu í vandræðum gegn smærri liðum í enska bikarnum í dag, en þó sluppu þau við stóráföll. Everton náði aðeins jafntefli 1-1 gegn Milwall, Middlesbrough gerði jafntefli við Nuneaton 1-1, Birmingham gerði markalaust jafntefli við Torquay og West Brom gerði 1-1 jafntefli við Reading. Að öðru leiti náðu úrvalsdeildarliðin að leggja andstæðinga sína að velli.

Eiður tryggði Chelsea sigurinn

Eiður Smári Guðjohnsen tryggði Chelsea 2-1 sigur á Huddersfield í enska bikarnum í dag með marki á 82. mínútu. Carlton Cole kom Chelsea yfir í leiknum, en Huddersfield sýndi mikla seiglu og náði að jafna, áður en Eiður Smári gerði út um leikinn í lokin. Eiður var fyrirliði Chelsea í dag.

ÍBV lagði Gróttu

DHL-deild kvenna hófst aftur í dag eftir langt vetrarfrí. ÍBV sigraði Gróttu í Eyjum 31-25. Ivana Velkjovic skoraði níu mörk fyrir Eyjastúlkur, en Renata Horvath skoraði mest fyrir Gróttu, átta mörk.

Martin Djetou látinn fara frá Bolton

Sam Allardyce hefur ákveðið að láta Martin Djetou fara frá félaginu eftir að leikmanninum mistókst að sanna sig síðan hann kom til Bolton í haust. Djetou hafði vonast til að fá að spila með liðinu í bikarnum nú um helgina til að sanna sig fyrir stjóranum, en sá hefur ekki talið sig hafa not fyrir leikmanninn.

Orðað við Iaquinta hjá Udinese

Breska dagblaðið Mirror greinir frá því í dag að Tottenham Hotspurs sé nú að undirbúa 7 milljón punda tilboð í ítalska sóknarmanninn Vincenzo Iaquinta hjá Udinese. Þá segir í sömu frétt að félagið sé í viðræðum við Portsmouth um að selja þá Noe Pamarot, Sean Davis og Pedro Mendes fyrir alls um 5 milljónir punda til að fjármagna kaupin á Iaquinta.

Everton undir gegn Millwall

Nú standa yfir 23 leikir í enska bikarnum og leikhlé komið í þeim flestum. Það sem af er stendur hæst að Millwall hefur yfir 1-0 í hálfleik gegn úrvalsdeildarliði Everton. Blackburn hefur yfir 2-0 gegn QPR með mörkum frá Todd og Bellamy, Chelsea hefur yfir 1-0 gegn Huddersfield með marki frá Carlton Cole, en þar er Eiður Smári Guðjohnsen í byrjunarliði Chelsea.

Clijsters sigraði í Hong Kong

Tenniskonan Kim Clijsters sigraði á sterku tennismóti sem fram fór í Hong Kong í dag, þegar hún lagði stigahæstu tenniskonu heims, Lindsay Davenport, í úrslitaleik 6-3 og 7-5. Þær stöllur verða svo í eldlínunni á opna ástralska meistaramótinu sem fram fer síðar í þessum mánuði.

Jón Arnór í stuði með Napoli

Jón Arnór Stefánsson var í stuði með liði sínu Napoli í ítölsku A-deildinni í körfubolta í gærkvöldi og skoraði 21 stig í sigri liðsins á Roma, 94-70 og er liðið í þriðja sæti deildarinnar eftir sigurinn.

Í viðræðum við Fulham

Markvörðurinn Antti Niemi er nú í viðræðum við Fulham um að ganga til liðs við félagið frá Southampton, þar sem hann hefur varið markið með ágætum síðustu ár. Charlton var einnig talið vera á höttunum eftir Niemi, en nýjustu fréttir herma að hann sé við það að skrifa undir hjá Fulham og snúi því aftur í úrvalsdeildina. Kaupverðið er talið vera um 1,5 milljónir punda.

Palace hafnaði stóru tilboði í Johnson

Birmingham hafði ekki erindi sem erfiði í dag þegar liðið bauð Crystal Palace 3 milljónir punda og tvo leikmenn í skiptum fyrir framherjann Andy Johnson, en Palace sagði þvert nei eins og áður. Svörin sem Birmingham fékk var að Palace ætlaði sér í úrvalsdeildina og því hefði það ekki efni á að selja Johnson fyrr en í allra fyrsta lagi í sumar.

Arsenal lagði Cardiff

Þremur leikjum er nú lokið í enska bikarnum. Arsenal lagði Cardiff 2-1 með mörkum frá Robert Pires, Aston Villa lagði Hull City 1-0 á útivelli með marki Gareth Barry, en 1. deildarlið Leeds náði jafntefli 1-1 á útivelli gegn Wigan og því verða liðin að mætast öðru sinni á heimavelli Leeds.

Phoenix burstaði Miami

Stjörnum prýtt lið Miami Heat á ekki sjö dagana sæla um þessar mundir og í nótt tapaði liðið stórt fyrir Phoenix Suns 111-93, eftir að hafa fengið á sig 47 stig í fyrsta fjórðung leiksins. Dwayne Wade lék ekki með Miami í nótt, en Steve Nash fór á kostum í liði Phoenix, skoraði 11 stig og gaf 19 stoðsendingar, þar af 12 í fyrsta leikhlutanum, sem er annar besti árangur í sögu NBA.

Robson að landa Ehiogu

Bryan Robson, stjóri West Brom, er sagður vera að leggja lokahönd á að fá til sín varnarmanninn Ugo Ehiogu frá Middlesbrough, en Ehiogu lék einmitt undir stjórn Robson hjá Boro á sínum tíma. Robson var í stífum viðræðum við forráðamenn Boro í gær og talið er að samningar gætu jafnvel náðst um helgina. Ehiogu er 33 ára miðvörður og á að baki landsleiki fyrir England, en hefur lítið spilað í vetur.

Thierry Henry ætlar að vera áfram hjá Arsenal

Franski knattspyrnusnillingurinn Thierry Henry hefur nú bundið enda á vangaveltur um framtíð hans hjá Arsenal, því í kvöld lýsti hann því yfir í viðtali við The Sun að hann ætlaði að vera áfram hjá félaginu í það minnsta út næsta keppnistímabil. Þetta eru mjög góðar fréttir fyrir stuðningsmenn Arsenal, sem óttuðust mjög að hann fetaði í fótspor Patrick Vieira og reyndi fyrir sér á meginlandinu.

Ferdinand semur til 2010

Hinn tvítugi Anton Ferdinand hjá West Ham hefur undirritað nýjan samning við félagið sem gildir til ársins 2010. Ferdinand hefur verið hjá félaginu allar götur síðan 2001 og er aðeins tvítugur. "Ég er í skýjunum yfir því að búið sé að semja við Anton, hann á eftir að gera stóra hluti í framtíðinni," sagði Alan Pardew, stjóri West Ham. Þess má geta að Anton er bróðir Rio Ferdinand hjá Manchester United.

Van Persie skrifaði undir

Hollenski framherjinn Robin Van Persie hefur skrifað undir nýjan samning við Arsenal sem nær allt til ársins 2011. Hann var keyptur frá Feyenoord fyrir 2,75 milljónir vorið 2004, en miklar vonir eru nú bundnar við hann í framtíðinni.

Fimm leikir í beinni í enska bikarnum

Það verður sannkölluð íþróttaveisla á Sýn um helgina, þar sem hápunkturinn verður FA bikarinn á Englandi og hvorki meira né minna en fimm leikir í beinni útsendingu á laugardag og sunnudag. Auk þessa verða beinar útsendingar úr ítalska- og spænska boltanum og NBA körfuboltanum svo eitthvað sé nefnt.

Hornets spila þrjá leiki í New Orleans

Forráðamenn New Orleans/Oklahoma City Hornets-liðsins í NBA deildinni hafa nú tilkynnt að liðið muni spila þrjá heimaleiki í New Orleans í vor sökum þess hve vel uppbygging í borginni gengur eftir að fellibylurinn Katrín reið þar yfir á sínum tíma.

Henry fer til Barcelona

Fyrrum sóknarmaður Arsenal, Ian Wright, segist búast fastlega við því að Frakkinn Thierry Henry gangi til liðs við Barcelona á Spáni í sumar og tekur þar með undir áhyggjur stjórnarformanns Arsenal á dögunum.

Brown orðaður við tvö félög

Michael Brown, leikmaður Tottenham, hefur nú verið orðaður við tvö félög í ensku knattspyrnunni, en hann hefur ekki átt fast sæti í liði Tottenham síðan þeir Jermaine Jenas og Edgar Davids gengu í raðir liðsins í sumar. Manchester City og Sheffield United eru sögð hafa mikinn áhuga á Brown, sem er mikill vinnuhestur, en hann kom einmitt til Tottenham frá Sheffield United fyrir tveimur árum.

Campo er falur fyrir rétt verð

Sam Allardyce segir að vel megi vera að hann leyfi varnarmanninum Ivan Campo að snúa aftur til Spánar, þar sem hann hefur verið orðaður við gamla liðið sitt Mallorca, en aðeins ef rétt verð fáist fyrir hann. Samningur Campo við Bolton rennur út í sumar.

Mwaruwari kominn til Portsmouth

Enska úrvalsdeildarliðið Portsmouth hefur gengið frá kaupum á landsliðsmanninum Benjani Mwaruwari frá Zimbabwe fyrir rúmar fjórar milljónir punda. Mwaruwari þessi er sóknarmaður og spilaði áður með franska liðinu Auxeirre. Hann er 27 ára gamall og valdi Portsmouth fram yfir Wigan og Marseille sem einnig höfðu áhuga á að fá hann í sínar raðir.

Ákærður fyrir ljóta tæklingu

David Sommeil, leikmaður Manchester City, á yfir höfði sér þriggja leikja bann fyrir ljóta tæklingu sína á Lee Young-Pyo hjá Tottenham í leik liðanna í vikunni. Martin Jol, stjóri Tottenham kallaði þetta ljótustu tæklingu sem hann hefði séð, en boltinn var víðsfjarri þegar Sommeil sparkaði í hné mótherja síns.

Gaydamak formlega orðinn meðeigandi

Alexandre Gaydamak hefur nú formlega gengið frá kaupum á helmingshlut í knattspyrnufélaginu Portsmouth, en stjórnarformaðurinn Milan Mandaric er sagður hafa þegið um 15 milljónir punda fyrir að láta eftir hlut sinn. Gaydamak er jafnvel sagður hafa í hyggju að taka yfir allt félagið á næstu 12 mánuðum, en það ku hafa verið skilyrði fyrir kaup hans á helmingshlut sínum nú.

Schwarzer á sölulistann

Middlesbrough hefur samþykkt beiðni markvarðarins Mark Schwarzer um að vera settur á sölulista hjá félaginu. Schwarzer hefur spilað 342 leiki fyrir Boro síðan hann kom til liðsins árið 1997, en hann er ástralskur landsliðsmaður. Honum þótti kominn tími til að breyta til og hefur Steve McClaren ákveðið að verða við beiðni hans, með nokkrum trega þó.