Ók í tvígang á lögreglubíl

Kona á fertugsaldri ók tvívegis á lögreglubíl á fullri ferð og stakk síðan af síðastliðið mánudagskvöld. Lögreglumennirnir kenndu eymsla í hálsi og var lögreglubíllinn óökufær, hann var nokkuð klesstur auk þess sem fram- og hliðarlíknarbelgir í bílnum blésu út.

Í fangelsi fyrir hnífstungur

Tvítugur maður var dæmdur í fimmtán mánaða fangelsi fyrir að stinga mann fjórum sinnum fyrir framan Broadway í Ármúla í september í fyrra. Tólf mánuðir af dómnum eru skilorðsbundnir.

Farþegum um Leifsstöð fjölgar

Farþegum um Flugstöð Leifs Eiríkssonar fjölgaði um rúm tuttugu prósent í nóvember miðað við sama tíma í fyrra, úr rúmlega 89 þúsund farþegum árið 2003 í rúma 107 þúsund farþega nú.

Rannsókn lögreglu engu skilað

Rannsókn lögreglunnar á Blönduósi á því hver kveikti í atvinnuhúsnæðinu Votmúla aðfaranótt þriðjudagsins 28. september hefur enn engu skilað. Kristján Þorbjörnsson yfirlögregluþjónn segir að enginn sé grunaður þó ummerki bendi til þess að kveikt hafi verið í húsinu.  

Spá öflugum fellibyljum árið 2005

Búist er við því að fjöldi fellibylja í Atlantshafi á næsta ári verði yfir meðallagi. Þetta kemur fram í spá veðurfræðinga við Ríkisháskólann í Colorado í Bandaríkjunum. Aldrei hefur fjárhagslegt tjón vegna fellibylja verið jafnmikið og á þessu ári. 

Magakveisa ekki vegna pottréttar

Búið er að útiloka það að sýkingin sem olli því að um 200 nemendur í Menntaskólanum á Akureyri fengu heiftarlega magakveisu og niðurgang var ekki vegna pottréttar úr mötuneyti skólans. Garðar Stefánsson, bryti skólans, segist hafa fengið þetta staðfest frá trúnaðarlækni skólans.

Kynferðisleg áreitni á Burger King

Eigandi Burger King matsölustaðar í St. Louis í Bandaríkjunum þarf að borga sjö starfsmönnum samanlagt 25 milljónir króna í bætur vegna kynferðislegrar áreitni á vinnustað.

Fær 300 milljarða króna í bætur

Árásin á World Trade Center hefur verið skilgreind sem tvær aðskildar árásir af dómstól í New York. Þetta þýðir að Larry Silverstein, sem var með byggingarnar tvær á langtímaleigu, fær greidda tæplega 300 milljarða króna í bætur.

Borgin brýtur lög í skólaeldhúsum

Formaður félags matvinnslumanna segir að samkvæmt lögum eigi aðeins faglærðir menn að meðhöndla matvæli í mötuneytum. Reykjavíkurborg fari ekki eftir því og brjóti reglugerðir Hollustuverndar og iðnaðarlög.

Hrun í rækju- og skelfiskveiðum bætt

Sveitarfélög sem hafa orðið fyrir búsifjum vegna samdráttar í veiðum fengu úthlutað mestum byggðakvóta. Þingmaður telur að kerfið letji útgerðir í því að efla sig og styrkja innan kvótakerfisins.

WHO fundar í Reykjavík

Tveggja daga aukafundur framkvæmdastjórnar Alþjóðaheilbrigðismálastofnunarinnar, WHO, hefst í Reykjavík nú á fimmtudaginn. Þetta er í fyrsta skipti sem framkvæmdastjórn stofnunarinnar heldur fund hér á landi en Davíð Á. Gunnarsson, ráðuneytisstjóri í heilbrigðis- og tryggingamálaráðuneytinu, var kjörinn formaður framkvæmdastjórnarinnar fyrr á þessu ári.

Skyndiverkfall á Ítalíu

Athafnalíf og samgöngur á Ítalíu verða meira og minna lömuð í dag vegna skyndiverkfalls félagsmanna í fjórum stærstu verkalýðsfélögum landsins til að mótmæla efnahagsstefnu stjórnvalda.

Verðhækkun á áfengi og tóbaki

Sterkt áfengi og tóbak hækka í verði eftir að Alþingi samþykkti með hraði í gærkvöldi að hækka áfengisgjald á sterku víni og tóbaki um 7%. Lögin öðlast þegar gildi en verð á léttvíni og bjór verður óbreytt. Samkvæmt þessu hækkar sterkt vín um rúmlega 5,5% út úr vínbúðunum og tóbak um tæp 4%.

Þingið samþykki vantrauststillögu

Leiðtogi stjórnarandstöðunnar í Úkraínu, Viktor Júsenko, hefur lýst því yfir að hann muni biðja þingið að samþykkja vantrauststillögu á stjórn Viktors Janúkovítsj. Tugir þúsunda stuðningsmanna stjórnarandstæðingsins Júsenkós mótmæla á götum úti í Kíev í Úkraínu, níunda daginn í röð. Mikil ólga er í landinu og óttast menn að upp úr geti soðið.

Von á fleiri hryðjuverkum í BNA

Hægri hönd Osama bin Ladens, Ayman al-Zawarhiri (LUM), segir baráttuna gegn Bandaríkjunum hvergi nærri lokið. Í myndbandi sem sýnt var á arabísku sjónvarpstöðinni al-Jazeera í gær segir hann að al-Kaída muni halda baráttunni áfram þar til Bandaríkjamenn breyti afstöðu sinni gegn múslimum.

Ætlað stórfé fyrir styrktarsöng

1,7 milljón krónur af tekjum af þrennum styrktartónleikum fyrir krabbameinssjúk börn voru ætlaðar Kristjáni Jóhannssyni óperusöngvara. Kristján sem áður hefur sagt að hann fengi aðeins farmiða og jeppa til afnota fyrir sinn hlut segist nú ætla að gefa eftir eina milljón af þóknun sinni. Aðrir söngvarar sömdu um lægri þóknanir.

Ók á konu og lét sig hverfa

Lögreglan í Keflavík leitar nú ökumanns sem ók á unga konu á mótum Strandgötu og Vesturgötu í Sandgerði um klukkan hálfsex í gærkvöldi og ók af vettvangi þar sem konan lá slösuð í götunni. Vegfarendur sem komu að kölluðu þegar á lögreglu og sjúkrabíl og var konan flutt rænulítil á slysadeild Landspítalans.

306 látnir í hitabeltisstormi

Að minnsta kosti 306 eru látnir eftir að hitabeltisstormur reið yfir Filippseyjar í nótt. Storminum fylgdu flóð og mikil rigning. Stormurinn í nótt fór yfir sama svæði og annar hitabeltisstormur gekk yfir í síðustu viku en þá létust a.m.k. 87 manns og 80 manns er enn saknað.

Rafmagnslaust í austurhlutanum

Klukkan 9.35 í morgun varð bilun í háspennustreng í Elliðaárdalnum í Reykjavík. Rafmagnslaust er á afmörkuðu svæði í austurhluta borgarinnar og austan við hana, í Norðlingaholti, í hverfum við Rauðavatn, skíðasvæðin í Bláfjöllum, hesthúsahverfi við Elliðavatn og víðar.

Fjölmörg umferðaróhöpp í gær

Fjölmörg umferðaróhöpp urðu suðvestanlands í gær og í gærkvöldi vegna hálku en ekki er vitað um alvarleg slys. Bíll valt hálfa aðra veltu skammt frá Hafnará í Borgarfirði í gær, annar valt út af Reykjanesbraut við Vogaafleggjara og sá þriðji út af Vífilsstaðavegi.

Strandsiglingum að ljúka

Mánafoss er nú í sögulegri siglingu umhverfis landið því þegar skipið kemur til Reykjavíkur á morgun leggjast strandsiglingar umhverfis landið af og flutningabílar taka við flutningunum. Skipið, sem hefur siglt til ellefu hafna á landinu, er nú á leið frá Eskifirði til Vestmannaeyja.

Fellst á nýjar kosningar

Viktor Janúkovítsj, yfirlýstur sigurvegari í forsetakosningunum í Úkraínu, sagðist í morgun fallast á nýjar kosningar ef hvorki hann né keppinautur hans, Viktor Júsjenko, leiðtogi stjórnarandstöðunnar, byðu sig fram. Ef fallist yrði á úrslit kosninganna myndi hann bjóða Júsjenko forsætisráðherrastólinn en Júsjenko hafnaði þessu boði þegar.

Dráttarvél eyðilagðist í eldi

Dráttarvél gjöreyðilagðist í eldi við bæinn Engihlíð í Vopnafirði í gærkvöldi en eldurinn náði ekki að teygja sig í íbúðarhúsið. Vélin var mannlaus þegar eldsins varð vart og var hann þá þegar orðinn magnaður. Svo vel vildi til að vindátt stóð af íbúðarhúsinu á dráttarvélina þannig að eldtugurnar náðu ekki til hússins.

Rafmagn komið á að nýju

Rafmagn er komið á svæði sem urðu rafmagnslaus eftir að háspennustrengur við Elliðavatn var grafinn í sundur um klukkan hálftíu í morgun. Svæðin sem um ræðir eru austast í borginni, Norðlingaholti, við Rauðavatn og Elliðavatn, auk skíðasvæðanna í Bláfjöllum og víðar.</font />

Sáttmáli við Bechtel undirritaður

Samiðn, Starfsgreinasambandið og Rafiðnaðarsambandið undirrituðu í gær sáttmála við Bechtel vegna framkvæmda við Fjarðarálsverkefnið. Tilgangur sáttmálans er að stuðla að jákvæðu samstarfi á milli Bechtels og stéttarfélaganna að því er segir í tilkynningu frá Samiðn.

Störf Íslendinganna mjög hættuleg

Einkarekin öryggisfyrirtæki, eins og tveir íslenskir lögregluþjónar starfa hjá í Írak, borga himinhá laun en störfin geta verið mjög hættuleg. Lögregluþjónarnir fá aðstoð frá utanríkisráðuneytinu ef á þarf að halda.

Lögregla leitar enn ökumannsins

Lögreglan í Keflavík leitar enn ökumanns sem ók á unga konu á mótum Strandgötu og Vesturgötu í Sandgerði um klukkan hálfsex í gærkvöldi og ók af vettvangi þar sem konan lá alvarlega slösuð í götunni.

40 manns drukkna í Írak

Að minnsta kosti fjörutíu manns drukknuðu í Írak í morgun þegar þeir reyndu að komast yfir beljandi á nyrst í landinu á pramma. Skyndilegur vatnselgur skolaði þeim af prammanum á andartaki. Aðeins fjórir komust lífs af að sögn sjónarvotta.

Síðasti dagur Þórólfs

Þórólfur Árnason lætur af störfum í dag sem borgarstjóri í Reykjavík. Við tekur Steinunn Valdís Óskarsdóttir. Þórólfur kvaddi starfsmenn borgarinnar í Tjarnarsal Ráðhúss Reykjavíkur í morgun. Að sögn upplýsingafulltrúa Ráðhússins var boðið upp á morgunverð, hljómsveit Ráðhússins spilaði nokkur lög og tók borgarstjóri eitt lag með þeim.

Betur á verði í hálkunni

Fólk virðist hafa verið betur á verði í hálkunni í morgun eftir ósköp gærdagsins. Umferðardeild lögreglunnar segir að ekki hafi orðið neitt óvenju margir árekstrar í morgun og á slysadeild sögðu menn að þar væri nánast venjuleg aðsókn.

Vilja endurgreiða í Lató-peningum

Latibær ehf. hefur ekki ákveðið hvort dómi um að hann skuli endurgreiða lán frá Nýsköpunarsjóði, með hlutabréfum upp á tugi milljóna, verði áfrýjað. Talsmaður fyrirtækisins segir þó að þeir vilji helst endurgreiða með Lató-peningum.

Fjölmargar vísbendingar borist

Lögreglan í Kópavogi hefur ekki enn haft hendur í hári unga mannsins sem nam stúlku úr Kópavogi með sér upp á Mosfellsheiði fyrir helgi og skildi hana þar eftir í myrkri og slyddu. Fjölmargar vísbendingar hafa borist og er lögreglan að vinna úr þeim. Hún hefur nú þegar rætt við á þriðja tug manna vegna málsins og á enn eftir að ræða við marga.

35 manns missa vinnuna

Síðasti starfsdagur Kísiliðjunnar við Mývatn er í dag. 35 manns missa vinnuna og að sögn fréttamanns Bylgjunnar sem er fyrir norðan er hljóðið í fólki þungt. Kísiliðjan ætlar að bjóða starfsfólkinu í helgarferð til Dyflinnar.

Bandarísk herflugvél fórst

Bandarísk herflugvél með sex manns innanborðs er talin hafa farist einhvers staðar í Afganistan. Um borð voru þrír áhafnarmeðlimir og þrír hermenn. Neyðarmerki heyrðust frá svæðinu í kringum Hindu Kush fjöllin og var leitað úr lofti og á landi.

Rekstrargrundvöllur verði tryggður

Landssamtökin Þroskahjálp skora á Alþingi að tryggja áfram rekstrargrundvöll Mannréttindaskrifstofu Íslands. Í yfirlýsingu frá Þorskahjálp segir að með tilkomu mannréttindaskrifstofunnar hafi skapast vettvangur fyrir félög og stofnanir sem starfa að mannréttindamálum og réttindabaráttu ýmissa hópa til að samhæfa krafta sína með velferð allra í huga.

Mílosevic var friðflytjandi

Slobodan Mílosevic var friðflytjandi sem var ekki að berjast fyrir Stór-Serbíu og Vesturveldin báru ábyrgð á því að Júgóslavía leystist upp í miklu blóðbaði. Þetta er fréttaskýring Evgeny Prímakovs, fyrrverandi forsætisráðherra og utanríkisráðherra Rússlands.

Hersveitir ráðast inn í Kongó

Stjórnvöld í Lýðveldinu Kongó segja að hersveitir frá Rúanda hafi ráðist inn í landið og séu nú að kveikja í þorpum við landamæri ríkjanna. Ekki er frekari fréttir að hafa þaðan að svo stöddu.

Schwarzenegger verður ekki forseti

Maria Shriver, eiginkona Arnolds Schwarzeneggers, ríkisstjóra Kaliforníu, segir að eiginmaður hennar verði aldrei forseti Bandaríkjanna. Shriver, sem er fræg fréttakona, segir að Bandaríkjamenn muni hugsanlega einhverntíma breyta stjórnarskránni þannig að innflytjandi geti orðið forseti.

80 grindhvalir syntu á land

Tæplega áttatíu grindhvalir syntu á land við strendur Nýja-Sjálands í gær. Björgunarmönnum hefur tekist að halda lífi í tuttugu þeirra og ná svipuðum fjölda aftur út á sjó.

Danskur herforingi fær dóm

Fyrrverandi foringi í leyniþjónustu danska hersins hefur verið dæmdur í hálfs árs fangelsi fyrir að leka innihaldi leyniskýrslu um gereyðingarvopn í Írak. Foringinn, Frank Grevil, sakaði einnig Anders Fogh Rasmussen forsætisráðherra um að hafa logið til þess að afla stuðningi við innrásina í Írak.

Mjallhvít á nektarmyndum

Aðstandendur jólahátíðarinnar í Dresden í Þýskalandi, þar sem Mjallhvít og dvergarnir sjö eru færðir upp árlega, hafa rekið Mjallhvíti úr hlutverkinu eftir að hún lét taka af sér nektarmyndir í freyðibaði, skreyttu rósaknöppum.

50% aukning áfengiseitrunar

Á fjórða þúsund Norðmenn voru fluttir á sjúkrahús á síðasta ári til þess að dæla úr maga þeirra vegna áfengiseitrunar. Þetta er 50% aukning frá árinu 1999. Fjölgunin hefur orðið mest hjá karlmönnum yfir fimmtugt.

Stjórnvöld bregðist við vandanum

Bæjarmálafélag Frjálslynda flokksins á Húsavík ítrekar fyrri ályktun sína frá því 15. september síðastliðinn þar sem félagið skoraði á stjórnvöld að bregðast þegar við þeim alvarlega vanda sem blasti við Mývatnssveit þegar starfsemi Kísiliðjunnar legðist af.

Flensan bankar á

Inflúensutilfellum hefur heldur fjölgað í nágrannalöndum okkar, að því er Haraldur Briem, sóttvarnalæknir hjá landlæknisembættinu, segir, en í litlum mæli þó.

Færri barnaslys í kennaraverkfalli

Um það bil 160 færri slys urðu á börnum á þeim tíma sem kennaraverkfallið stóð yfir en á sama tíma í fyrra, samkvæmt upplýsingum frá landlæknisembættinu.