Þingkonan hlaut EM-brons eftir mikla spennu

Keppnin fór fram í Druskininkai í Litháen og var Sigríður á meðal keppenda í öldungaflokki 2 (50-60 ára), í -63 kg flokki, í bekkpressu með búnaði.

Hún byrjaði á að gera ógilt í 72,5 kg lyftu en bætti fyrir það og setti nýtt Íslandsmet með 75 kg lyftu. Það hefði þó ekki dugað til verðlauna en Sigríður gerði sér lítið fyrir og lyfti 82,5 kg í lokalyftu sinni, stórbætti þannig Íslandsmetið í sínum flokki og landaði bronsverðlaunum.

Hún lyfti 2,5 kg meira en heimakonan Danguole Popovic. Sigurvegari í flokknum varð hin norska Anette Heimstad-Aasbo sem lyfti 115 kg.

Sigríður átti líka sinn þátt í því að Ísland varð í þriðja sæti í liðakeppninni í öldungaflokki 2. Guðný Ásta Snorradóttir, Laufey Kristjánsdóttir og Sesselja S. Ómarsdóttir voru með henni í að ná þeim glæsta árangri. Guðný hlaut silfur í +84 kg flokki, með því að lyfta 147,5 kg, Laufey hlaut brons í -69 kg flokki með 87,5 kg lyftu, og Sesselja lyfti svo mest 100 kg í -76 kg flokki.

Árangur Guðnýjar Ástu var sá næstbesti heilt yfir í öldungaflokki 2, þvert á þyngdarflokka, samkvæmt stigagjöf alþjóða kraftlyfingasambandsins.

Fleiri Íslendingar sem kannski eru þekktari fyrir önnur afrek en í kraftlyftingum náðu í verðlaun á mótinu því stjörnukokkurinn Hrefna Rósa Sætran vann til silfurverðlauna í -69 kg flokki, í öldungaflokki 1, þar sem hún lyfti mest 100 kg og bætti sig um heil 7,5 kg.

Rebekka Sylvía Ragnarsdóttir var einnig í öldungaflokki 1 og hlaut brons í -57 kg flokki með því að lyfta 82,5 kg.