Ekki með tök á eldinum og slökkvi­liðs­stjóri hljóp á sig

Espen Reite aðgerðastjóri lögreglu segir í samtali við NRK að slökkvilið hafi þó góða yfirsýn og að hættan á því að eldurinn breiði úr sér sé minni. Enn logar í glæðum og smáeldar brenna víða.

Jan Helge Kaiser slökkviliðsstjóri á vettvangi tekur undir þetta við miðilinn. Hann sagði á samfélagsmiðlum í morgun að slökkvilið hefði náð stjórn á eldinum en nú bakkar hann með það. Hann segir að enn séu eldar sem unnið er að því að slökkva.

Fimm slökkviliðsbílar eru nú að störfum í hverfinu. Herinn og almannavarnir eiga sömuleiðis fulltrúa á vettvangi auk lögreglu.

Almannavarnir hafa gert út sex þyrlur í brunastörfin og aðrar sjö eru í viðbragðsstöðu. Átta hundrað þúsund lítrum af vatni hefur verið varpað á eldinn sem komið er. Um hundrað brunaliðar hafa tekið þátt í slökkvistarfinu frá sautján slökkviliðsstöðum á svæðinu.